Дунёнинг 4 та энг йирик оммавий ахборот воситалари, жумладан BBC, AFP, The Associated Press ва Reuters Ғазода ҳукм сураётган вазият бўйича қўшма баёнот эълон қилиб, сектордаги журналистларнинг жуда оғир шароитларда яшаётганидан жиддий хавотир билдирди. Бу ҳақда The Guardian хабар берди.
ОАВнинг таъкидлашича, Ғазо секторида фаолият юритаётган журналистлар нафақат оилаларини, балки ўзларин ҳам боқа олмаяпти.
Исроил халқаро мухбирларга анклавга киришни тақиқлагани сабабли, уруш зонасида фақатгина блокадада қолиб кетган ва фаластинлик журналистлар фаолият олиб бораётган эди.
Ахборот агентликлари бир неча ойдан бери Исроил расмийларидан журналистларнинг Ғазога кириш ва чиқишига эркинлик беришини сўраб келади. Аммо сўнгги ҳафталарда нашрлар раҳбариятлари урушни ёритишга уринаётган баъзи журналистларнинг жисмоний ҳолатидан жиддий хавотирга тушган. Хусусан, шу ҳафтада Франциянинг AFP агентлиги Исроилдан журналистлар ва уларнинг оилаларини зудлик билан ҳудуддан эвакуация қилишга рухсат сўраганди.
“Тўқнашувларда бир қанча журналистларимиз ҳалок бўлди, баъзилари жароҳат олди, бошқалари эса асирга олинди. Аммо ҳеч биримиз журналистларнинг очликдан ўлганини эслай олмаймиз”, деган AFP вакиллари.
Ушбу агентликнинг фотограф ходими ижтимоий тармоқларда шундай хабар қолдирган:
“Менда ОАВ учун ишлашга ортиқ куч қолмади. Жуда озиб, ҳолсиз бўлиб қолганман. Ортиқ ишлай олмайман”.
Изоҳ (0)