Ҳиндистон футбол ассоциацияси (ҲФА) “Барселона” собиқ бош мураббийи Хави Эрнандесни миллий терма жамоа бош мураббийи сифатида тайинлаш таклифини рад этди. Бу ҳақда The Khel India нашри хабар берди.
Маълум қилинишича, ҳозирда Ҳиндистон терма жамоаси учун янги мураббий қидирилаётган бир пайтда Хави ўз хизматларини ушбу мамлакат ассоциациясига таклиф қилган. Бироқ улар 45 ёшли испаниялик мутахассиснинг маош борасидаги юқори талабларини инобатга олиб, уни номзодлар рўйхатига киритмасликка қарор қилган.
Эслатиб ўтамиз, Хави 2024 йил ёзидан буён ҳеч қаерда фаолият юритмаяпти. Олдинроқ у Саудия Арабистонининг “Ал-Аҳли” клубини бошқариши мумкинлиги ҳақида хабарлар тарқалган эди, аммо бу миш-мишлар ўз тасдиғини топмади.
Маълумот учун, Хави 2021 йилдан 2024 йилгача “Барселона” бош мураббийи сифатида фаолият олиб борган. Шунингдек, у Қатарнинг “Ас-Садд” клубида ҳам икки йил мобайнида ишлаган эди.
Изоҳ (0)