Қозоғистон президенти Қосим-Жўмарт Тўқаев Қозоғистон нефтини етказиб бериш йўналишлари бўйича топшириқ берди, деб ёзади Tengrinews.
Транспорт-транзит салоҳиятини ривожлантириш бўйича мажлис чоғида давлат раҳбари, хусусан, нефть етказиб беришни диверсификация қилишни муҳим вазифа деб атади.
“Энг устувор йўналиш Транскаспий йўналиши ҳисобланади. ъKazMunayGazъга уни амалга ошириш учун оптимал вариантни ишлаб чиқишни топшираман, шу жумладан, Тенгиз лойиҳаси инвесторларини жалб этиш имконияти билан бирга. Ҳукумат ъСамрук-Казинаъ билан биргаликда Атирау — Кенкияк ва Кенкияк — Кумкол нефть қувурлари қувватларини ошириш бўйича чоралар кўриши керак”, — деди Тўқаев.
Транскаспий халқаро транспорт йўналиши Россияни айланиб ўтган ҳолда Европага етказиб беришни кўзда тутади, у Хитой, Қозоғистон, Каспий денгизи акваторияси, Озарбайжон, Грузия, Туркия ва Қора денгиз орқали Европа мамлакатларига ўтиб кетади. Транскаспий халқаро транспорт йўналиши ассоциациясига 8 та мамлакатдан 20 та компания аъзо бўлиб, улар темир йўл маъмуриятлари, портлар, кема ва логистика компанияларини ўз ичига олади.
Тўқаевнинг баёноти Россия суди Каспий қувур консорсиумининг денгиз терминали ишини 30 кунга тўхтатиш ҳақидаги қароридан бир кун ўтиб янгради. Бу 2022 йилда учинчи марта Қозоғистон нефтининг Россия орқали жаҳон бозорига чиқарилишини тўхтатиб қўйиши мумкин.
Аввалроқ Қосим-Жўмарт Тўқаев Европа Иттифоқига Россия нефтини Қозоғистон нефтига алмаштиришни таклиф қилган эди. Президент, шунингдек, Европа Иттифоқини муқобил трансконтинентал йўлакларни, жумладан, Транскаспий халқаро транспорт йўналишини ривожлантиришда ҳамкорлик қилишга чақирган. У Қозоғистон жаҳон ва Европа бозорларидаги вазиятни барқарорлаштириш учун ўзининг углеводород салоҳиятидан фойдаланишга тайёрлигини маълум қилган.
Мавзуга доир: Тўқаев Путиннинг ёнида ДХР ва ЛХРни квази-давлат ҳудудлари деб атади