Шерзод Шерматов интернетда муҳокамаларга сабаб бўлаётган ачинарли аҳволдаги синфхоналар бўйича муносабат билдирди

Ҳозирда Ўзбекистонда мингдан зиёд мактаб филиаллари мавжуд. Таҳлилларга кўра, уларнинг 300 таси қўлбола усулда аҳоли томонидан қурилган. Бу ҳақда 24 октябрь куни АОКАда ўтказилган матбуот анжуманидан сўнг журналистларга интервью берган халқ таълими вазири таъкидлаб ўтди, дея хабар бермоқда «Дарё» мухбири Миролим Исажонов.

Шерзод Шерматовнинг айтишича, олис ва тоғли ҳудудлардаги мактаб филиалларини таъмирлаш ёки фаолиятини тугатиш маҳаллий ҳокимликлар ихтиёрида. Чунки бу бўйича давлат раҳбари тегишли топшириқларни берган.

«Охирги икки йил ичида мактабларга нисбатан инвестиция ўзгарди. Унгача мактабларга инвестиция киритилмаган, асосан, коллеж ва академик лицейларга инвестиция бўлган. Аҳолимизнинг ҳам, иқтисодиётимизнинг ҳам аҳволи мақтанадиган даражада эмас. Буни тан олишимиз керак, бу беркитадиган нарса эмас.

Интернетда кўп муҳокама қилинадиган видео ва суратлардаги синфхоналар, асосан, мактаб филиалларидаги ҳолат бўлиб чиқади. Чекка ва тоғли ҳудудлардаги аҳолининг ўзи ҳашар йўли билан қурган бинони филиал қилиб очиб қўйишган. Чунки асосий мактаб уларга анча узоқ, транспорт муаммоси бор. Кўп филиаллар пахсадан қўл учида қурилгани учун аҳволи қўрқинчли ҳолатда бўлади. Бу каби филиаллар ССР даврида ҳам, ундан кейин ҳам давлат дастури бўйича бунёд этилмаган. Аҳоли сонининг ошиши натижасида ёшлар сафи ҳам кенгаймоқда. Шу боис кўпроқ мактаблар, таълим масканлари қуришимиз лозим. Шунча йил қилинмаган ишни икки йилда амалга ошириб бўлмайди.

Айни пайтда мамлакатимизда 1170 та мактаб филиаллари бор. Таҳлил қилиб кўрсак, мавжуд филиалларда тизимдаги ўқувчиларнинг бир фоизи таҳсил олмоқда. Тахминан, 300 та филиал қўлбола усулда қурилган, яъни аҳолининг ўзи қуриб олган, таъмирланмаган. Ўша қишлоқларда аҳоли сони ҳам оз, у ерларда сув, йўл, электр муаммолари ҳам бор. Лекин доим мактаб филиаллари муҳокама қилинади. Ота-оналар фарзандини узоқ масофадаги мактабга юборгиси келмайди, йўл ҳам жуда узоқ. Бу сингари муаммоларга марказлашган комплекс асосида ёндашиш керак.

Шу ўринда айтиш керакки, Президентимиз эски кўринишдаги мактаб филиаллари бўйича маҳаллий ҳокимликлар олдига вазифа қўйган. Филиалларнинг барчасини таъмирлаш ёки ёпиб, асосий мактаб таркибига қўшиб юбориш ёхуд тўлақонли мактабга айлантириш топшириғи берилган. Ҳокимликлар Президент топшириғини бажаришса, филиаллар муаммоси ўз-ўзидан ҳал бўлади», — деди халқ таълими вазири.