Дастурни Жиззах давлат педагогика институти тарих факультети, тарих ўқитиш методикаси кафедраси катта ўқитувчиси Фаррух Акчаев ва талаба Фаррух Пардабоев вилоят туризмни ривожлантириш ҳудудий бошқармаси ходими Лола Санаева билан ҳамкорликда ишлаб чиқди, деб хабар қилади ЎзА.
Вилоятда сайёҳларни қизиқтирадиган тарихий-археологик манзиллар кўп. 372 та маданий мерос объектлари давлат муҳофазасига олинган. Шундан 42 таси тарихий обида ва зиёратгоҳ, 267 таси археологик ёдгорлик, 63 таси монументал ёдгорликлардир.
Интернетнинг Google тармоғида Shrines of Jizzakh деб аталган ушбу мобил дастурдан вилоятдаги муқаддас қадамжолар ва зиёратгоҳлар ҳақида маълумотлар, уларнинг фотосуратлари ўрин олган. Дастурда кўрсатилган махсус тугмача босилса, ҳар бир иншоотга бориш йўналиши, масофаси кўрсатилади.
Мобил дастурга маълумотларнинг 40 та хорижий тилдаги таржимаси киритилгани ундан фойдаланувчиларга, айниқса сайёҳларга катта қулайлик яратади.
«Жиззах мамлакатимиз марказий қисмида жойлашганлиги, республикамиз шаҳарларини ва қўшни давлатларни боғловчи автомобиль ҳамда темирйўл ушбу вилоят ҳудуди орқали ўтгани туризмни ривожлантиришда катта имкониятларидан бири ҳисобланади. Айни пайтда ушбу имкониятлардан самарали фойдаланиб ҳудудга сайёҳларни жалб этиш мақсадида бир қатор инновацион лойиҳалар амалга оширилаётир. Интернет тармоғида вилоятдаги қадамжолар ҳақида маълумот берувчи мобил илованинг яратилиши зиёрат туризмини ният қилган хорижлик меҳмонлар ва ҳамюртларимиз учун яна бир қулайлик бўлди», — дейди вилоят туризмни ривожлантириш ҳудудий бошқармаси ходими Лола Санаева.
Изоҳ (0)