Табиат қўйнида яшашга мўлжалланган энг қулай кемперлар

Кемперлар — автоуйлар ишлаб чиқарувчи компаниялар шаҳар шовқинидан қочиб, табиат қўйнида дам олишни истаганларга мўлжалланган бир қанча моделдаги чодирлар, ўзиюрар автоуйлар, туристик автофургонларни тақдим этди. Novate улар орасида энг яхши ва қулай деб топилганларига тўхталиб ўтди.

Tentsile Vista кўп қаватли осма чодири

Дарахтдан дарахтга ўтказилган арқонларга мустаҳкамланадиган Tentsile чодирлари илк бор 2012 йилда тақдим этилган эди. Компания ишланмаларини тўхтатмади ва секин-аста чодирни дарахтларда муаллақ турган уйга айлантирди.

Нам ўтказмайдиган Tentsile Vista чодири бир неча қаватга, ҳашаротларга қарши тўрга ва ёмғирга қарши бостирмага эга. Уни қўшимча қаватлар билан кенгайтириш ва кўп даражали портатив осма уйга айлантириш мумкин. Бу ҳолда унинг ичига тўққиз киши ва ҳатто ундан кўпроқ одам сиғади. Қўшимча қаватларсиз асосий чодирнинг нархи 595 доллар туради.

SylvanSport GO-Easy енгил кемпинг-трейлери

SylvanSport GO-Easy ихчам тиркамаси 125 килограмм вазнга эга бўлиб, кичик автомобиллар ва мотоцикллар билан барча турдаги спорт анжом-аслаҳалари ва асбобларини шатакка олишга мўлжалланган. Унинг ичида тунаш имкониятини яратиш мақсадида SylvanSport чодир билан таъминланган. GO-Easy’нинг нархи 2000 доллар, Roost қўшимча чодирининг нархи — 3000 доллар.

Tonke Fieldsleeper International экспедицион автомобили

2014 йилга қадар барча Tonke’ни Голландиянинг ёғоч тиркамалар ишлаб чиқарувчи компанияси сифатида танир эди. Бугун у бозордаги энг чиройли алюминийли тиркамалардан бири — Airstream ишлаб чиқарувчиси сифатида машҳур.

Mercedes Sprinter негизида яратилган Fieldsleeper International экспедицион автомобиль бўлиб, уни оддий ва тўла узатмали вариантларда харид қилиш мумкин. Борт ускуналари — музлатгич, плита, ёритиш тизими ва кондиционер — ишлаши учун машина 400—600-ваттли қуёш батареялари тизимлари билан таъминланган. Беш ўринли кемпер душ, ҳожатхона ва бошқа қулайликларга эга.

Fieldsleeper International учун икки хил двигатель таклиф қилинмоқда: 190 от кучига эга Mercedes Sprinter 519Cди — 192 000 доллар, 160 от кучига эга Sprinter 516Cdi — 154 576 доллар.

Wide Path велосипедли кемпери

40 килограммли Wide Path кемпери, кемпингга мўлжалланган, автомобиль билан шатакка олинадиган анъанавий тиркамалардан фарқли равишда, велосипед ёрдамида шатакка олинади. Велосипедли кемпер икки ёши катта киши ва бир болани тунаб қолиш учун етарли жой билан таъминлай олади.

Wide Path йиғилувчи стол, йиғилувчи тўшак ва 300 литр суюқлик сиғадиган идишга эга. Унинг нархи — 2500 доллар.

MVP Aero MVP гидросамолёт-кемпери

«Дунёдаги энг универсал самолёт» деб эълон қилинган MVP гидросамолёт, балиқчилик қайиғи ва сузувчи-учувчи автофургон ўртасидаги омихта бир ишланмадир. Самолёт-амфибия қуруқликка, қорга ва сувга қўна олади.

Сувда аппарат қўшимча двигателдан фойдаланган ҳолда қайиқ мисоли сузади, унда ҳаттоки балиқ овлаш учун палуба ҳам бор. Қанотларни олиб қўйиб, унинг сувдаги ҳаракатини янада қулайлаштириш мумкин.

Тунда MVP ускуналар панели силжитилади, унинг ўрнида кенг ва текис пол очилиб, чодир ўрнатилади. Комплектда ҳаво билан тўлдирилувчи матрас ва тўр беланчак бор, охиргиси двигатель устуни ва дум орасига боғланади. MVP 189 000 долларга баҳоланмоқда, аммо у 2018 йилдан олдинроқ сотувга чиқарилиши даргумон бўлиб қолмоқда.

EarthRoamer XV-LTS Xpedition 2014 гибриди

EarthRoamer XV-LTS 2014 – йўлтанламас ва кемпер гибриди. Колорадодаги EarthRoamer компанияси ўз лойиҳаси учун асос қилиб 300 от кучига эга V8 турбо-дизелли Ford F-550 йўлтанламасини олди. Кемперда қулай олти ўринли меҳмонхона, 5:56 ўлчамдаги тунаш жойи, душли ва биоҳожатли ванна хонаси кўзда тутилган. Барча электр ускуналар қуёш батареяларидан қувват олади.

Overland Expo’да тақдим этилган моделда ҳатто ҳашаматли буюмлар, жумладан, тарошланган бокаллар жойлашган шкаф, Keurig қаҳва дамловчи қурилмаси, 46 дюймли телевизорга эга Tailgating пакети бор эди. Кемпернинг нархи 312 000 доллардан 560 000 долларгача бўлиши мумкин.

Volksleisure T5 кемпер-вани

Wellhouse Leisure компанияси микроавтобуслардан кемперлар ясаши билан машҳурдир. Бу сафар у Volkswagen негизида автофургон яратди. Volksleisure T5 кемпери тўрт кишилик ётоқ ўрнига эга. Унинг ичидаги ошхонада музлатгич, нонушта столи ва тоза сув учун 35 литрли идиш ўрнатилган. Volksleisure T5 ни 75 000 долларга сотиб олиш мумкин.

Knaus Travelino концепти

Германиянинг Knaus Tabbert компанияси келажак кемпери концептини тақдим этди. У махсус ишлаб чиқилган ускуна ёрдамида ихчам майдондаги кемпердан оптимал даражада фойдаланишни кўзда тутади.

Ўлчами жуда кичкина бўлишига қарамай, трейлерда ошхона, тамаддихона, икки ўринли тўшак, ванна ва ҳатто ташқи ошхона ҳам бор. Бунга эришиш учун Travelino сурилма деворлар билан таъминланди, бу эса ванна ва ҳожатхона учун жой ажратишга ёрдам берди: улар қўллангандагина очиб қўйилади, бошқа вақтда эса йиғиқ ҳолда туради. Ҳозирча Travelino концепт даражасида бўлиб, серияли шаклда ишлаб чиқарилиши борасида бирор маълумот йўқ.

Action Mobil Global XRS 720 6х6 кемпери

Улкан Action Mobil Global XRS 7200 кемпери 18 тоннали тўла узатмали олти ғилдиракли MAN юк машинаси негизида яратилган. Унинг капоти остида 720 от кучига эга двигатель жойлаштирилган. Бу кемпер ёрдамида дунёнинг исталган нуқтасига бориш ва у ерда исталганича қолиш мумкин.

Кенг салонда иқлим назорати тизими ўрнатилган. Унинг ичига кирган одам кемпер чўлда ёки ноқулай географик ландшафтда эканлигини унутиб қўйиши мумкин. 720 литрли бакда тоза сув сақланади, мультимедиа тизими эса 40 дюймли HD телевизор, йўлдош интернети, Apple TV, Bose аудиотизими ва катта ҳажмли қаттиқ диск билан таъминланган. Машинада, шунингдек, кир ювиш машинаси ва қуритиш дастгоҳи бор.

Кемпер нархи 1,1 миллион долларни ташкил қилади.