StartupFactory.uz'нинг ижтимоий тармоқлардаги саҳифаларида «Стартап учун ғояни қаердан топиш мумкин?» — деган саволни кўп сўрашади. Одамлар ўзлари арзирли нарса ўйлаб топа олмагани учун бир-иккита ғояларни тавсия қилишни сўрайди.
Кремний водийсининг таниқли сиймоларидан бири, Lean Startup ва Customer Development методологияси ҳаммуалифи Пол Грем ёзганидек, «Стартап учун ғоя топишнинг энг яхши йўли — у ҳақда ўйламаслик. Муаммони топинг, у ўзингизда бўлса, яна-да яхши».
Тўқима муаммоларни ҳал этадиган фойдаланувчиларнинг ўйлаб топилган ғоялардан иборат стартаплари муваффақият қозонмайди.
Нима учун ўзингизда бўлган муаммо устида ишлаш бунчалик муҳим? Бунинг сабабларидан бири — муаммо ҳақиқатда мавжуд эканлигига ишонч ҳосил қилиш. Ҳеч кимда бўлмаган муаммони ечишга уриниш — стартаплар томонидан кўпинча амалга ошириладиган хатодир. Қандайдир маҳсулот ёки ечимнинг йўқлигини ўзингиз сезишингиз керак. Муаммонгиз ечими учун пул тўлашга тайёр бўлишингиз керак.
Нима учун бунчалик кўп фаундерлар ҳеч кимга керак бўлмаган лойиҳаларни яратади? Чунки улар бегона фикр ва таклифларга асосланган ҳолда ғоя ўйлаб топишга уринишдан бошлайди.
Ён-атрофингизга боқинг, қайси соҳада ўзингизнинг ва бошқаларнинг ҳаётини яхшилай олган бўлардингиз — шу ҳақда ўйлаб кўринг. Click мобил банкинг ғояси айнан шу тариқа вужудга келган: ғоя муаллифлари тўлов қабул қилиш пунктига боргандан кўра, телефон ва сайт орқали тўлаш анча қулай эканлигини тушунган. MyTaxi ва Taxi.uz ғояси ҳам айнан шу тарзда юзага келган: одамлар операторга қўнғироқ қилиб, қаерда эканлигини ярим соат тушунтиргандан кўра, харитадаги локацияни белгилаб, таксини смартфон орқали чақириш қулайроқ эканлигини англаган.
Эътиборли бўлишни ўрганинг. Атрофингиздан яхши ишланмаган ёки ноқулай нарсаларни қидиринг ва уни қай тарзда яхшилай олишингиз ҳақида ўйлаб кўринг.
Мақолани тайёрлашда қуйидаги манбадан фойдаланилди: http://megamozg.ru/post/1782/
Лойиҳа «Дарё» ва StartupFactory.uz томонидан ишга туширилган.
Изоҳ (0)