Oman Air’ga O‘zbekistonga muntazam parvozlarni amalga oshirishga ruxsat berildi
Ummon Sultonligining Oman Air aviakompaniyasiga O‘zbekistonga muntazam aviaqatnovlarni amalga oshirish uchun ruxsatnoma berildi, deb xabar bermoqda “O‘zaviatsiya” agentligi.
Ma’lum qilinishicha, O‘zbekiston va Ummon Sultonligi o‘rtasida havo qatnovi to‘g‘risidagi hukumatlararo bitimga asosan 2-aprel kuni ushbu aviakompaniyaga Maskat—Toshkent—Maskat yo‘nalishida muntazam aviaqatnovlarini amalga oshirish uchun foydalanish ruxsatnomasi rasmiylashtirib berildi.
Parvozlar Boeing-737 samolyotlarida amalga oshiriladi.
2023-yilning aprelida Uzbekistan Airports rahbariyati Oman Air aviakompaniyasi vitse-prezidenti bilan muzokaralarda Maskat va O‘zbekiston shaharlari o‘rtasida ikki tomonlama aviaqatnovlarni yo‘lga qo‘yish masalalari muhokama qilingandi.
Oman Air — bosh qarorgohi Maskatda joylashgan Ummonning asosiy aviatashuvchisi. Aviakompaniya muntazam ichki va xalqaro yo‘lovchi reyslarini, shuningdek, charter reyslarni amalga oshiradi.
O‘zbekiston fuqarolari Ummonda 14 kun davomida vizasiz bo‘lib turishi mumkin. Ushbu tartib 2024-yilda joriy qilingan.
