Qoraqalpog‘istonning Qo‘ng‘irot tumanida Lacetti va Cobalt ishtirokida sodir bo‘lgan yo‘l-transport hodisasi oqibatida 8 kishi vafot etdi.
Respublika Ichki ishlar vazirligi matbuot xizmatining ma’lum qilishicha, hodisa 22-iyul kuni soat 19:05 atrofida sodir bo‘lgan. 30 yoshli M.N. Lacetti avtomobilini tuman markazidan “Qoraqalpog‘iston” PPJ tomonga haydab borayotib boshqaruvni yo‘qotgan va qarama-qarshi tomonga chiqib ketib, 23 yoshli U.D. boshqaruvidagi Cobalt bilan to‘qnashgan.
Oqibatda Lacetti haydovchisi M.N. va uning 38 yoshli yo‘lovchisi A.B. hamda Cobalt haydovchisi U.D. hodisa joyida vafot etgan.
Lacetti’ning 49 yoshli yo‘lovchisi B.T. hamda Cobalt’ning 27, 30, 31 va 53 yoshli yo‘lovchilari Qo‘ng‘irot tumani tibbiyot birlashmasiga yotqizilib, ko‘rsatilgan tibbiy muolajalarga qaramay olgan tan jarohatlari oqibatida hushiga kelmasdan vafot etgan.
YTH oqibatida avtomobillardan biri butunlay yonib ketgan.
Holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, tergov harakatlari olib borilmoqda.
Izoh (0)