UFC yengil vazn toifasining 5-raqamli jangchisi Peddi Pimblett UFC’dagi navbatdagi jangini yengil vazn toifasining istalgan kuchli vakiliga qarshi o‘tkazishga tayyorligini aytdi.
Angliyalik sportchi uchun eng qiziqarli variantlardan biri esa sobiq chempion Iliya Topuriyaga qarshi uzoq kutilgan jang bo‘lib qolmoqda. Ikki jangchi o‘rtasidagi ziddiyat anchadan beri davom etib kelmoqda.
Pimblett UFC tomonidan Topuriya bilan jang bo‘yicha hech qanday rasmiy taklif olmaganini ma’lum qildi. Shunga qaramay, u ushbu bahsda ishtirok etishga tayyor.
“Topuriyaga qarshi jang o‘tkazishni istayman. U bilan hisob-kitob qilishni xohlayman”, dedi Pimblett.
Peddi Pimblett 12-iyul kuni UFC 329 turnirida fransiyalik Benua Sen-Denini bor-yo‘g‘i 52 soniyada bo‘g‘ish usuli bilan taslim etgandi. U yil boshida Jastin Getjiga qarshi vaqtinchalik chempionlik jangida mag‘lubiyatga uchragan edi.
Pimblett yengil vaznning yetakchi jangchilaridan biri bilan oktagonga chiqishga tayyor. U, shuningdek, Jastin Getji, Arman Sarukyan, Charlz Oliveyra va boshqa kuchli jangchilarga qarshi bahs o‘tkazishi mumkinligini istisno etmadi.
Angliyalik sportchi navbatdagi jangini yil oxirigacha o‘tkazishni rejalashtirmoqda. Uning asosiy maqsadi esa yengil vazn toifasida chempionlik uchun kurashishdir.
