Yevropa Chempionlar Ligasining kelayotgan haftada bo‘lib o‘tadigan o‘yinlari oldidan Nepalagi suv toshqini qurbonlari xotirasi uchun bir daqiqalik sukut e’lon qilinadi. Bu haqda Yevropa futbol assotsiatsiyalari ittifoqi (UEFA) matbuot xizmati ma’lum qildi.
Shuningdek, har bir o‘yin oldidan maydonga “Sen yolg‘iz emassan, Nepal” yozuvi tushirilgan maxsus banner olib chiqiladi.
“Butun Yevropa futbol oilasi ushbu haftadagi o‘yinlar oldidan Nepal xalqiga o‘zining chuqur hamdardligi va qo‘llab-quvvatlashini bildirish uchun birlashadi. Biz ularga ushbu fojia hamda uning oqibatlarini yengib o‘tishda kuch va iroda tilaymiz”, dedi UEFA prezidenti Aleksander Cheferin.
Ma’lumot o‘rnida, 26-avgust kuni Nepal shimolida kuchli suv toshqini yuz berdi. Bunga qor ko‘chkisi sabab bo‘lgan. Katta tezlikda yopirilib borgan kuchli oqim o‘z yo‘lidagi aholi punktlarini vayron qilgan va ulkan hududlarni suv ostida qoldirgan. Hozirgi vaqtga kelib, qurbonlar soni 1,3 ming kishidan oshgani xabar qilinmoqda.
Dahshatli tabiiy ofat oqibatida 32 ming oila boshpanasiz qoldi, 7 500 ga yaqin uy vayron bo‘ldi hamda mamlakatning markaziy qismidagi muhim infratuzilma faoliyatiga jiddiy zarar yetdi. Qariyb 5 ming kishi, shu jumladan, 589 nafar chet el fuqarosi bedarak yo‘qolgan deb hisoblanmoqda.
Eslatib o‘tamiz, UEFA Chempionlar Ligasining 1-tur uchrashuvlar 8—10-sentyabr kunlari bo‘lib o‘tadi.
