“Bunyodkor” stadionida elektr ta’minoti qarzdorlik tufayli 4-sentyabr sanasidan e’tiboran to‘liq uzib qo‘yilgani oqibatida, O‘zbekiston Professional futbol ligasi vaqtincha masofadan ishlash rejimiga o‘tdi. Bu haqda Liga matbuot xizmati ma’lum qildi.
“Mazkur holat Superliga va Proliga uchrashuvlarining translyatsiya jarayoni hamda internet translyatsiyalarini taqdim etishda sifatning pasayishiga olib kelmoqda. Ma’lumki, rasmiy uchrashuvlar davomida Liga translyatsiya signallarini o‘zida qabul qilib, markazlashtirilgan tartibda ularni turli platformalar orqali qayta uzatish ishlarini amalga oshiradi”, deyiladi xabarda.
Qayd etilishicha, stadiondagi elektr energiyasi bilan yuzaga kelgan muammo sababli Liga serverlari to‘liq nofaol holatga kelgan. Shundan kelib chiqib, tashkilot uchrashuvlardan signallarni qayta uzatishda tashqi serverlardan foydalanmoqda.
Xabarda Liga bilan bog‘liq yumushi bo‘lgan tashkilotlar va jismoniy shaxslardan murojaatlarni [email protected] elektron pochtasi orqali yuborishlari so‘ralgan.
