“Barselona” Xorvatiya terma jamoasi darvozaboni Dominik Livakovichni transfer qilishga yaqin turibdi. Bu haqda Marca nashri xabar berdi.
Manbaga ko‘ra, kataloniyaliklar 31 yoshli futbolchining amaldagi klubi “Fenerbahche” bilan muzokaralarni ijobiy ruhda olib bormoqda. Biroq tomonlar hozircha yakuniy kelishuvga erishmagan.
“Barselona” transferni 1-sentyabrgacha yakunlashni rejalashtirmoqda. Klub Livakovichni dastlab bir mavsumga boshqa jamoaga ijaraga berishni ko‘zlamoqda.
2026/27-yilgi mavsumda kataloniyaliklar darvozasini Joan Garsiya va Voytsex Shensni himoya qiladi. Livakovich esa jamoaga kelasi yil yozida qo‘shilishi kutilmoqda. O‘sha paytga kelib Shensnining “Barselona” bilan shartnomasi yakuniga yetadi.
Shundan so‘ng xorvatiyalik darvozabon asosiy posbon Joan Garsiyaning o‘rinbosariga aylanishi mumkin.
Qayd etilishicha, Livakovichning transferi “Barselona”ga 3–5 million yevro atrofida tushishi kutilmoqda.
Ma’lumot uchun, Livakovich 2025/26-yilgi mavsumni “Fenerbahche” safida boshlagan. Keyinchalik u ijara asosida “Jirona”ga o‘tdi, biroq Ispaniya klubida bor-yo‘g‘i bitta uchrashuvda maydonga tushdi. 2026-yil yanvarida esa xorvatiyalik darvozabon ijara asosida “Dinamo Zagreb”ga qaytdi.
Livakovich mavsumning ikkinchi qismida Zagreb klubi safida 12 ta uchrashuvda ishtirok etib, 7 ta bahsda darvozasi daxlsizligini saqlab qoldi.
