Yevropa futbol assotsiatsiyalari ittifoqi (UEFA) hozirda FIFA prezidenti lavozimida ishlayotgan Janni Infantinoga nisbatan rasmiy tergov ishlarini boshlashi kutilmoqda. Bu haqda The Telegraph nashri xabar berdi.
Xabarga ko‘ra, tekshiruvlarga Infantinoning jazmaniga qilingan to‘lovlar sabab bo‘lgan. Nashrning yozishicha, Infantino UEFA bosh kotibi bo‘lib ishlagan davrda, u bilan ishqiy munosabatda bo‘lgan xodimaga tashkilot hisobidan yuz minglab yevro miqdorida tovon puli to‘lab bergan. Manbaga ko‘ra, bo‘lajak tekshiruvlar funksionerning UEFAdagi 16 yillik faoliyatini (2000-yildan 2016-yilgacha) to‘liq qamrab oladi.
Ma’lumot o‘rnida, Janni Infantino 2009-yildan 2016-yilgacha UEFA bosh kotibi lavozimida ishlagan. Shundan so‘ng u FIFA rahbari etib saylandi va keyinchalik muqobil nomzodlarsiz yana ikki marta ushbu lavozimni saqlab qoldi. E’tiborli jihati shundaki, 56 yoshli mutaxassis 2001-yildan buyon qonuniy nikohda yashaydi va uning to‘rt nafar farzandi bor.
