Istanbulda boʻlib oʻtgan Konferensiyalar ligasi 2-saralash bosqichidan oʻrin olgan bahsda “Bashakshehir” Finlyandiyaning “Inter Turku” jamoasi bilan 1:1 hisobida durang oʻynadi.
Mehmonlar 16-daqiqada hujumchi Klinton Degol Jeftaning aniq zarbasi evaziga hisobni ochdilar. Mezbonlar ikkinchi boʻlimda hisobni tenglashtirdilar. 54-daqiqada himoyachi Emin Bayram Yusuf Sarining uzatmasini golga aylantirdi.
Eldor Shomurodov mazkur uchrashuvni asosiy tarkibda boshladi va 69-daqiqada zaxiraga olindi. Abboz Fayzullayev esa 61-daqiqada zaxiradan oʻyinga qoʻshilib, uchrashuv oxiriga qadar harakat qildi.
Soccerway nashrining talqiniga koʻra, Shomurodovning harakatlari 7,2 ballga, Fayzullayevniki esa 7 ballga baholangan.
