Rossiya prezidenti Vladimir Putin mamlakatni tark etgan fuqarolarning mol-mulkini musodara qilish imkonini beruvchi qonunni imzoladi. Hujjat 10-iyun kuni rasmiy huquqiy axborot portalida e’lon qilindi.
Qonunga ko‘ra, Rossiya manfaatlariga qarshi qaratilgan deb baholangan ma’muriy huquqbuzarliklar bo‘yicha javobgarlikka tortilayotgan shaxslarning mol-mulkiga taqiq qo‘yilishi mumkin. Yangi tartib 2026-yil 1-sentyabrdan kuchga kiradi.
Gap Ma’muriy javobgarlik to‘g‘risidagi kodeksning o‘ndan ortiq moddasi haqida ketmoqda. Ular orasida xorijiy agent faoliyati qoidalarini buzish, ekstremistik materiallarni tayyorlash va tarqatish, feyk axborotlar yoyish, nomaqbul tashkilotlar faoliyatida qatnashish, Rossiya armiyasini obro‘sizlantirish, shuningdek, Sovet Ittifoqi rahbariyati harakatlarini fashistlar Germaniyasi bilan ommaviy ravishda tenglashtirish kabi bandlar mavjud.
Qonunga ko‘ra, mol-mulkka taqiq qo‘yish ma’muriy jarima ijrosini ta’minlash chorasi sifatida qo‘llanadi. Bunda jismoniy shaxsga tegishli musodara qilingan mol-mulk qiymati jarima miqdori bilan cheklanmaydi.
Mol-mulkni musodara qilinishi uning sotilishi, hadya qilinishi yoki boshqa tarzda tasarruf etilishini taqiqlashni anglatadi.
Shuningdek, aktivlar bo‘yicha taqiq sudning yakuniy qarori chiqishidan oldin ham qo‘llanishi mumkin. Ya’ni mol-mulk kelajakda tayinlanishi mumkin bo‘lgan jarimani undirishni kafolatlash maqsadida oldindan taqiq qo‘yiladi.
Qonunga muvofiq, sudya bunday iltimosnomani ro‘yxatga olinganidan keyin bir kundan kechiktirmay ko‘rib chiqishi kerak. Bunda mol-mulk egasini oldindan xabardor qilish talab etilmaydi.
