Portugaliyalik mutaxassis Joze Mourinyo “Real Madrid”ga qanday futbolchilarni jalb qilish bo‘yicha bir qarorga keldi.
Diario AS nashrining xabar berishicha, portugaliyalik mutaxassis Madrid klubi rahbariyatiga tarkibni kuchaytirish uchun yulduz futbolchilarni sotib olishdan manfaatdor emasligini maʼlum qilgan.
Taʼkidlanishicha, Mourinyo maydonda koʻp mehnat qilishga tayyor, jangovarlik xislatlarini namoyish eta oladigan va yaqqol namoyon boʻluvchi xudbinlikdan (egodan) xoli boʻlgan “och” futbolchilarni jalb qilishni talab qilmoqda.
Murabbiy jamoada yuqori motivatsiya va jamoaviy ruhga ega boʻlgan, oʻzining intensiv futbol borasidagi talablariga toʻliq javob bera oladigan oʻyinchilarni koʻrmoqchi.
Eslatib o‘tamiz, Joze Mourinyo 2010-yilning iyulidan 2013-yilning iyuniga qadar ham “Real” bosh murabbiyi sifatida faoliyat olib borgan. Portugaliyalik mutaxassis “qirollik klubi”ni tark etganidan keyin “Chelsi”, “Manchester Yunayted”, “Tottenhem”, “Roma”, “Fenerbahche” va “Benfika” kabi jamoalarni boshqardi.
