Birgina qo‘shig‘i orqali dunyoga tanilgan va millionlab daromad olgan yulduzlar

Bugungi ro‘yxatdagi xonandalar va qo‘shiq mualliflari hayotining qolgan qismini hech qanday moliyaviy tashvishsiz o‘tkazish imkonini beradigan yetarlicha daromadga ega. Bunday natijaga birgina mukammal tarzda yaratilgan qo‘shiq sabab bo‘ldi. Yulduzlar hozirda nafaqaga chiqish va muvaffaqiyatdan zavqlanish o‘rniga sevimli sohasi — san’at yo‘nalishida o‘z faoliyatini davom ettirib kelmoqda. Qo‘shiqning yangilangan versiyasi aslidan mashhurroq bo‘lgan taqdirda ham, muallif daromadning bir qismiga ega bo‘ladi.

“Every Breath You Take” — Sting

Qo‘shiq 1982-yilda The Police musiqiy guruhi tomonidan ijro etilgan. Qo‘shiq matni mazkur guruhning sobiq a’zosi xonanda Stingga tegishli. Relizdan so‘ng ushbu trek ketma-ket sakkiz hafta davomida Billboard Top 100 chartida birinchi o‘rinni egallagan.

Puff Daddy nomi bilan tanilgan xonanda Shon Kombs o‘zining marhum do‘sti — The Notorious B.I.G. xotirasiga bag‘ishlab “I’ll Be Missing You” trekini yozgan. Qo‘shiqning ushbu versiyasi 7 million AQSH dollari miqdorida daromad keltirdi.

“Yesterday” — Jon Lennon va Pol Makkartni

Pol Makkartni The Beatles guruhining 1965-yilda yaratilgan mashhur “Yesterday” qo‘shig‘i matnini yozdi. U xonanda Jon Lennon bilan mualliflik huquqini bo‘lishdi va ularning ikkisi trekdan katta daromad oldi. Qo‘shiq AQSH chartlarida uzoq vaqt davomida birinchi o‘rinni egalladi. “Yesterday” mualliflarga har yilda 30 million dollar foyda keltirdi.

“Happy birthday to you” — The Hill Sisters

Tug‘ilgan kun bilan tabriklash haqidagi qo‘shiq 1893-yilda Kentukki shtatining Luisvill shahridan opa-singil Hill tomonidan yozilgan. Patti Hill maktabda o‘qituvchi, uning singlisi Mildred esa bastakor edi. Ular qo‘shiqni maktabdagi tadbir uchun yaratishdi. Oradan bir asrdan ortiq vaqt o‘tsa-da, mazkur qo‘shiq butun dunyo bo‘ylab bayramlarning ajralmas qismiga aylangan.

Asar mualliflik huquqi bir necha marta o‘zgargan va hozirda Warner Chappell Music kompaniyasiga tegishli. “Tug‘ilgan kuningiz bilan” qo‘shig‘i kuniga taxminan 5000 AQSH dollari miqdorida gonorar keltiradi. Uning eng mashhur versiyasi Merilin Monro tomonidan 1962-yilda prezident Jon Kennedi uchun ijro etilgan.

“Shape of You” — Ed Shiran, Stiv Mak va Jonni Makdeyd

Xonanda Ed Shiranning 2017-yilda namoyish etilgan “Shape of You” qo‘shig‘i barcha davrlarning eng yuqori daromadga chiqqan musiqasi hisoblanadi. Asar britaniyalik musiqachilar Stiv Mak va Jonni Makdeyd tomonidan yozilgan bo‘lib, 42 million nusxada sotilgan. Ed Shiran eng yaxshi pop ijrochi sifatida “Gremmi” mukofoti bilan taqdirlangan.

“Despacito” — Luis Rodriges, Ramon Ayala va Erika Ender

“Despacito” 2017-yilda ulkan muvaffaqiyatga erishib, barcha davrlarda eng ko‘p sotilgan uchinchi qo‘shiqqa aylandi. Luis Rodriges, Ramon Ayala va Erika Ender tomonidan yozilgan bu asar dastlab Luis Fonsi va Deddi Yanki tomonidan ijro etilgan va Lotin Amerikasida hitga aylangan.

Jastin Biber keyinchalik Kolumbiyadagi tungi klubda trekni eshitib qolib unga remiks yozishga qaror qildi. Ushbu versiya 2017-yilda 24 million nusxada sotilgan yilning eng mashhur qo‘shiqlaridan biriga aylandi.

“Oh, Pretty Woman” — Roy Orbison va Bill Dis

Roy Orbison va Bill Dis birgalikda 1964-yilda ommaga deyarli tanilmagan “Oh, Pretty Woman” qo‘shig‘ini yozdi. Trek 1990-yilda “Go‘zal ayol” filmida jaranglagach, qo‘shiq nufuzi oshib ketdi.

Filmning muvaffaqiyati tufayli qo‘shiq hitga aylandi va 19,75 million AQSH dollar daromadga chiqdi. Yozuvchi Bill Dis 2012-yilda ta’kidlaganidek, u hali ham yiliga 100 000 dan 200 000 AQSH dollarigacha foyda oladi.

“I Will Always Love You” — Dolli Parton

Mazkur qo‘shiqning asl muallifining ismi ko‘pchilikka noma’lum. Dolli Parton buni 1973-yilda yozgan va qo‘shiq Billboard Hot Country Songs chartida ikki marta birinchi o‘rinni egallagan.

Uitni Hyuston 1992-yilda “Tansoqchi” filmi uchun qo‘shiqning yangi versiyasini ijro etdi. Kaver 24 million nusxada sotildi va Dolli Partonga katta tijoriy muvaffaqiyat olib keldi.