O‘zbekiston milliy terma jamoasi murabbiylar shtabida yangi mutaxassis ish boshladi. Italiyalik sobiq futbolchi Rolando Byanki endilikda hujumchilarni tayyorlash jarayoniga mas’ul bo‘ladi.
Byanki o‘z vaqtida Italiya A Seriyasida o‘zining gol sezish qobiliyati va jismoniy ustunligi bilan tanilgan hujumchi bo‘lgan.
Byanki futbolchilik faoliyati davomida “Atalanta”, “Kalyari”, “Rejina”, “Manchester Siti”, “Torino”, “Bolonya” va “Malyorka” kabi klublar sharafini himoya qilgan. Shuningdek, turli yoshdagi Italiya terma jamoalarida ham to‘p surgan.
43 yoshli mutaxassis umumiy hisobda 444 ta uchrashuvda maydonga tushib, 127 ta gol va 21 ta golli uzatmani amalga oshirgan.
Ma’lumot o‘rnida, O‘zbekiston terma jamoasi guruh bosqichidagi ilk o‘yinini Meksikada o‘tkazadi, qolgan ikki uchrashuv esa AQSHdagi stadionlarda bo‘lib o‘tadi. “Oq bo‘rilar” 18-iyun kuni birinchi turda Kolumbiyaga qarshi maydonga tushadi. Ushbu uchrashuvga Meksika poytaxtidagi “Atsteka” stadioni mezbonlik qiladi. Jamoa ikkinchi tur doirasida 23-iyun kuni Krishtianu Ronaldu boshchiligidagi Portugaliya terma jamoasi bilan o‘ynaydi. Mazkur bellashuv AQSHdagi “Xyuston” stadionida o‘tkazilishi belgilangan. Guruhdagi so‘nggi uchrashuv 28-iyun kuni “Atlanta” stadionida Kongo Demokratik Respublikasiga qarshi bo‘lib o‘tadi.
