Ispaniya chempionatining 2-divizioni — Segunda 37-turi doirasida kechgan “Ueska” va “Real Saragosa” (1:0) jamoalari o‘rtasidagi Aragon derbisi ommaviy janjal bilan yakunlandi. “Saragosa”ning argentinalik darvozaboni Esteban Andrada o‘yinning so‘nggi soniyalarida raqib sardorini urgani uchun qizil kartochka oldi.
Uchrashuvning qo‘shib berilgan daqiqalarida hakam “Ueska” sardori Xorxe Pulidoni turtgani uchun Andradaga ikkinchi sariq kartochkani ko‘rsatib, uni maydondan chetlatdi. Biroq, qizil kartochka olganidan so‘ng Andrada o‘zini tutib tura olmadi va maydonni tark etish o‘rniga Pulidoning yuziga kuchli zarba berdi.
Ushbu holat maydonda ommaviy mushtlashuvga sabab bo‘ldi. Natijada hakam yana ikki nafar futbolchi — “Ueska” darvozaboni Dani Ximenes va “Saragosa” himoyachisi Dani Tasendega ham qizil kartochka korsatdi.
Natijada uchrashuv tartibsizliklar bilan yakunlandi. Hakam Damaso Arsediano Monesilyo tomonidan tuzilgan qaydnomada voqea batafsil qayd etilgan. Unda Andradaning harakati tajovuzkorlik, ortiqcha kuch ishlatish sifatida baholanib, zarba oqibatida Pulidoning chap yonoq suyagi ko‘kargani ta’kidlangan. Shuningdek, mojaro davomida “Saragosa” darvozaboni Dani Ximenes hamda futbolchi Tasende ham maydondan chetlatilgani qayd etilgan.
Mazkur holatda aynan hakam qaydnomasi hal qiluvchi hujjat hisoblanadi. Ispaniya intizomiy qoidalariga ko‘ra, jarohatsiz tajovuz uchun 4 tadan 12 tagacha, jarohat bilan bog‘liq holatlarda esa 6 tadan 15 tagacha o‘yinga diskvalifikatsiya belgilanishi mumkin. Pulidoning jarohat olgani haqidagi qayd esa jazo muddatining oshishiga sabab bo‘lishi ehtimolini kuchaytirmoqda.
Voqea nafaqat Andradaning shaxsiy jazosi, balki “Real Saragosa” uchun ham jiddiy oqibatlarga olib kelishi mumkin. Asosiy darvozabonning uzoq muddatga safdan chiqishi jamoaning sport natijalariga ta’sir qilishi, shuningdek uning klubdagi kelajagini ham savol ostiga qo‘yishi mumkin.
