Pokiston 27-aprel kuni Afg‘oniston sharqidagi Kunar viloyatiga aviazarba berdi. Oqibatda kamida to‘rt nafar tinch aholi vakili halok bo‘ldi, yana 70 ga yaqin kishi jarohatlandi. Bu haqda “Tolibon” matbuot kotibi o‘rinbosari Hamtulla Fitrat bayonotiga tayanib Amu TV xabar berdi.
Zarbalar viloyatdagi bir nechta hududga, jumladan, viloyat markazi Asadobod shahri va Manogay tumanining ayrim qismlariga berilgan. Hamtulla Fitratning so‘zlariga ko‘ra, yaralanganlar orasida 30 nafarga yaqin talaba bor. Shunigdek, ayollar va bolalar ham hodisadan jabr ko‘rgan.
Mahalliy vaqt bilan soat 14:00 atrofida boshlangan hujumlar oqibatida Sayid Jamoliddin Afg‘on universitetining Ta’lim fakulteti binosi va odamlarning yashash uylari zarar ko‘rgan.
“Tolibon” hujumlarni urush jinoyati deb atadi. Ular Pokistonni tinch aholi va ta’lim muassasalarini nishonga olishda ayblamoqda. Pokiston rasmiylari bir necha kunlik tanaffusdan so‘ng qayta boshlangan ushbu zarbalar yuzasidan hozircha izoh bermadi.
Afg‘oniston va Pokiston chegarasida keskinlik yana avj olgan. 26-aprel oqshomidan boshlab janglar kuchaydi. Xususan, Qandahor viloyatining Spin Boldak tumanida “Tolibon” kuchlari va Pokiston qo‘shinlari o‘rtasida bir necha bor to‘qnashuvlar sodir bo‘ldi.
Ikki tomon o‘rtasidagi chegara orti zo‘ravonliklari ikki oydan ortiq vaqtdan beri davom etmoqda. Pokiston “Tahriki Tolibon Pokiston” (TTP) jangarilari Afg‘oniston hududidan turib harakat qilayotganini da’vo qiladi. “Tolibon” esa bu ayblovlarni rad etib keladi.
BMT tinch aholi orasida qurbonlar soni ortib borayotganidan ogohlantirdi. Tashkilot ma’lumotlariga ko‘ra, oxirgi to‘qnashuvlarning dastlabki ikki haftasida Afg‘oniston sharqida 70 dan ortiq tinch aholi vakili o‘ldirilgan.
Eng mudhish voqealardan biri 16-mart kuni sodir bo‘lgan. O‘shanda Pokistonning Omid reabilitatsiya markaziga bergan zarbalari oqibatida 269 kishi halok bo‘lgan.
