Eron Isroilning “Mossad” razvedka xizmati bilan hamkorlikda ayblangan ikki fuqaroni qatl qildi. Bu haqda Asharq Al-Awsat nashri xabar berdi.
Sud ma’lumotlariga ko‘ra, qatl etilganlar Muhammad Ma’sum Shohiy va Hamid Validiy hisoblanadi. Ular “Mossad” razvedka tarmog‘iga a’zolikda aybdor deb topilgan. Mahkumlar xorijda, jumladan, Iroq Kurdistonida maxsus tayyorgarlikdan o‘tgan va mamlakat ichida hujumlar uyushtirganlikda ayblangan. Ularning aynan qachon qo‘lga olingani ochiqlanmagan.
Ikki erkak “moharebeh” (Xudoga qarshi urush ochish), shuningdek, “dushman guruhlar va sionistik rejim bilan hamkorlik qilish” kabi og‘ir jinoyatlarda ayblanib, o‘lim jazosiga hukm qilingan.
Eron 28-fevralda AQSH va Isroil bilan urush boshlanganidan buyon bir nechta qatl jazolarini amalga oshirdi. Ularning aksariyati aynan josuslik ayblovlari bilan bog‘liq. 8-apreldan buyon tomonlar o‘rtasida ikki haftalik o‘t ochishni to‘xtatish sulhi amal qilmoqda. Inson huquqlari bo‘yicha xalqaro tashkilotlar hisobotiga ko‘ra, Eron qatllar soni bo‘yicha dunyoda Xitoydan keyin ikkinchi o‘rinda turadi.
