Qariyb bir oydan beri davom etayotgan AQSHning Eronga qarshi urushi davomida kamida 303 nafar amerikalik harbiy jarohatlangan bo‘lishi mumkin. Bu haqda ABC News telekanali amerikalik mansabdor shaxsga tayanib xabar berdi.
Jarohatlanganlarning 273 nafari davolanib xizmatga qaytgan, 10 nafari esa og‘ir tan jarohati olgan. Mansabdorning so‘zlariga ko‘ra, bu jarohatlarga Eron dronlari va boshqa portlovchi qurilmalar sabab bo‘lgan.
“Jarohatlarning aksariyati bosh miya shikastlanishi bo‘lib, ular xotira bilan bog‘liq muammolar, migren, charchoq va ko‘plab kognitiv buzilishlarni keltirib chiqarishi mumkin”, deyiladi xabarda.
Avvalroq Eron urush davomida yuzlab AQSH harbiylari halok bo‘lganini da’vo qilgan. Xususan, 4-mart kuni Eronning “Xotam al-Anbiyo” markaziy harbiy qo‘mondonligi shtabi Eronning Dubayga bergan zarbasi oqibatida 100 dan ortiq amerikalik dengiz piyodasi halok bo‘lganini ma’lum qildi.
27-mart kuni The Wall Street Journal gazetasi AQSH prezidenti Donald Trampning Eron bilan muzokaralar samarali kechayotgani haqidagi bayonotlari fonida Pentagon Yaqin Sharqdagi vaziyatni nazorat qilish uchun 10 000 ga yaqin harbiy xizmatchini jo‘natishi mumkinligi haqida yozdi.
