Germaniya hukumati Eron rejimining mintaqadagi davlatlarga hujumlari to‘xtamasa, Isroil va AQSHning islom respublikasiga qarshi harbiy kampaniyasiga qo‘shilish masalasini jiddiy ko‘rib chiqmoqda. Bu haqda Germaniya siyosiy va harbiy doiralaridagi manbalarga tayanib Isroilning Army Radio stansiyasi xabar berdi.
Isroil radiosining Germaniya Tashqi ishlar vazirligi rasmiylari hamda Bundestagning Tashqi ishlar qo‘mitasi a’zolaridan olgan ma’lumotiga ko‘ra, AQSH bilan birgalikdagi ehtimoliy harbiy harakatlar rejasi allaqachon ishlab chiqilmoqda.
Kutilayotgan ko‘mak yo‘nalishlariga quyidagilar kiradi: to‘g‘ridan to‘g‘ri havo zarbalarida ishtirok etish hamda harbiy va aviatsiya texnikasi bo‘yicha ko‘mak berish, deyiladi yahudiy nashrida.
Berlinning rasmiy pozitsiyasi
Garchi harbiy doiralarda rejalar muhokama qilinayotgan bo‘lsa-da, Germaniya tashqi ishlar vaziri Yoxann Vadepul mamlakatning ushbu mojaroda ishtirok etish niyati yo‘qligini ta’kidladi.
Shu bilan birga, Germaniya kansleri Fridrix Mers AQSH prezidenti Donald Tramp bilan muzokaralar o‘tkazishga tayyorgarlik ko‘rayotgani ma’lum qilindi.
Yevropa uchligining ogohlantirishi
Kecha tunda, 1-mart kuni Fransiya, Germaniya va Buyuk Britaniya Eronning mintaqadagi hujumlarini keskin qoralab, qo‘shma bayonot bilan chiqdi.
“Zarurat tug‘ilganda, Fors ko‘rfazidagi manfaatlarimiz va ittifoqchilarimizni himoya qilish uchun Eronga qarshi mudofaa choralarini ko‘rishga tayyormiz”, deyiladi uch davlat bayonotida.
Ayni paytda, Buyuk Britaniya bosh vaziri mamlakatning Yaqin Sharqdagi bazalaridan Eronga zarba berish uchun foydalanishga ruxsat berdi.
