Londonning “Arsenal” jamoasi Milanning “Inter” klubi markaziy himoyachisi Alessandro Bastoniga jiddiy qiziqish bildirmoqda. Bu haqda Football Transfers nashri xabar berdi.
Angliya klubi rahbariyati fikricha, jamoa bosh murabbiyi Mikel Artetaning taktik sxemasi ko‘p jihatdan Bastonining kuchli tomonlariga mos keladi. “Inter” 90-100 million yevrodan boshlanadigan takliflarni ko‘rib chiqishga tayyor. Futbolchining Milan klubi bilan amaldagi shartnomasi 2028-yilning yoziga qadar mo‘ljallangan.
Bastoni 2017-yilning avgust oyida 31 million yevro evaziga “Atalanta”dan “Inter”ga o‘tgan edi. Joriy mavsumda u klub miqyosida 33 ta o‘yinda ishtirok etib, 2 ta gol va 6 ta samarali uzatmani amalga oshirgan. Transfermarkt portali ma’lumotlariga ko‘ra, himoyachining bozor qiymati 80 million yevroni tashkil etadi.
Avvalroq Opta statistik portali “Arsenal”ning APLda chempion bo‘lish ehtimolini 80 foizga baholagan edi. 2-pog‘onadagi “Manchester Siti”ning imkoniyatlari esa bor-yo‘g‘i 16,9 foizga teng deb topilgan.
Ayni paytda Mikel Arteta jamoasi APL turnir jadvalida 64 ochko bilan 1-pog‘onani band etgan. Londonliklar “Manchester Siti”ni 5 ochkoga ortda qoldirmoqda.
