Gollivudning eng mashhur juftliklaridan biri — Tom Holland va Zendaya rasman turmush qurishdi. Bu haqda AQSH kinoaktyorlar gildiyasi (SAG Awards) mukofotini topshirish marosimi oldidan Zendaya shaxsiy stilisti Lo Rouch jurnalistlarga ma’lum qildi.
Mashhur stilist ikki yosh barchadan sir tutgan holda yashirin to‘y marosimini o‘tkazishganiga shama qildi.
“To‘y allaqachon bo‘lib o‘tdi. Siz uni o‘tkazib yubordingiz”, dedi Rouch.
Jurnalist ushbu xabar qanchalik haqiqat ekanini so‘raganida, u jilmayib:
“Bu mutlaqo haqiqat”, deya javob berdi.
Ularning unashtirilgani haqidagi mish-mishlar esa Zendaya “Oltin globus — 2025” mukofotini topshirish marosimida chap qo‘lining nomsiz barmog‘iga yirik brilliant uzuk taqib chiqqanidan so‘ng ko‘paydi. Ko‘p o‘tmay, Tom ushbu xabarlarni tasdiqladi: intervyularidan birida u Zendayani shunchaki “hamkasbingiz” deb atagan muxbirning so‘zini to‘xtatib, “bo‘lajak rafiqam” deya uni tuzatgan edi.
