Ukraina havo mudofaa bo‘linmalari rus armiyasi tomonidan mamlakat shaharlari va energetika infratuzilmasiga uchirilayotgan Shahed dronlarining 90 foizini urib tushirmoqda. Bu haqda prezident Zelenskiy Myunxen xavfsizlik konferensiyasi doirasida ma’lum qildi.
Ukrainaliklar yetakchisining ma’lum qilishicha, harbiylar Shahed dronlariga qarshi kurashishda turli usul va texnologiyalardan foydalanyapti. Jarayonda ittifoqchi davlatlar ko‘mak beryapti.“Har kecha kamida 100 ta Shahed’ga duch kelamiz, ayrim tunlari esa bizga qarshi 400, hatto 500 tagacha dron uchirishadi. Ukraina mudofaachilari ularning qariyb 90 foizini urib tushirmoqda”, degan Zelenskiy.
“Hamkorlarimiz bilan birgalikda bu kabi vositalarni tobora ko‘proq ishlab chiqaryapmiz. Kelgusida o‘zimizni yetarli miqdorda ta’minlaydigan darajaga chiqamiz. Shunda Shahed dronlari Rossiya uchun ahamiyatini yo‘qotadi. Ammo bu yerda “hamkorlar” va “birgalikda” so‘zlari eng asosiydir”, degan Zelenskiy.Shahed dronlari
Rossiya armiyasi tomonidan Ukraina shaharlari, xususan energetika infratuzilmasiga qarshi qo‘llaniladigan Shahed dronlari 2-2,5 ming km masofaga uchib bora oladi. Ammo ularni ommalashtirigan omil ishlab chiqarish xarajatlarining pastligi bilan bog‘liq. Mana shunday dronlardan biri taxminan 25-50 ming dollarga tushadi. Holbuki, ularni tutib olish uchun qo‘llaniladigan zenit raketalar bir necha yuz, ba’zan esa million dollarga baholanadi.
Ukraina harbiylari Shahed dronlariga qarshi kurashning bir necha usullarini o‘ylab topgan. Pulemyotlar va tungi ko‘rish vositalari bilan ta’minlangan mobil brigadalar, “tutib oluvchi” dronlar, vertolyotlar va elektron urush tizimlari shular jumlasidan.
