Keniyalik ekofaol Trufena Mutoni daraxtni 72 soat quchoqlab turgan holda yangi jahon rekordini o‘rnatdi. Shu tariqa u avvalgi natijani ortda qoldirib, Ginnes rekordlar kitobiga kiritildi.
Uch sutka davomida 22 yoshli faol daraxtni qo‘yib yubormagan. Bu orqali u atrof-muhitni muhofaza qilish muammolari va tabiatga ehtiyotkor munosabatda bo‘lish zarurligiga e’tibor qaratgan. Mutoni shu tariqa Gana vakili Frederik Boake tomonidan o‘rnatilgan va 50 soatdan sal ko‘proq davom etgan rekordni yangilagan.
Bu Mutonining rekord o‘rnatishga birinchi urinishi emas. 2025-yil fevral oyida u 48 soat daraxtni quchoqlagan holda turishga muvaffaq bo‘lgan. Ammo bu safar u o‘z natijasini sezilarli darajada yaxshiladi.
Faolning so‘zlariga ko‘ra, uning birinchi urinishi ramziy ishora bo‘lgan. Ikkinchi urinishi esa ongli majburiyat sifatida amalga oshirilgan. Dastlabki urinishga tayyorgarlik jarayonida u quruq ro‘za tutgan, suv iste’molini kamaytirgan va organizmini uzoq vaqt suvsiz qolishga moslashtirish uchun mashq qilgan. Biroq ikkinchi urinish oldidan u sog‘liq uchun xavfli bo‘lishi mumkinligini anglab, bu usuldan voz kechgan.
