Senegal terma jamoasi va Saudiya Arabistonining “An-Nassr” klubi hujumchisi Sadio Mane Afrika Millatlar Kubogida endi maydonga tushmasligini ma’lum qildi. 2026-yilgi turnir finalida senegalliklar Marokashni 1:0 hisobida mag‘lub etgan edi. Ushbu g‘alaba orqali Mane Afrika Millatlar Kubogini ikki bor qo‘lga kiritgan futbolchiga aylandi.
“Bu Afrika Millatlar Kubogidagi mening so‘nggi raqsim, afsuski. Biroq men har doim Senegalni qo‘llab-quvvatlaydigan 12-futbolchi bo‘lib qolaman”, — deydi Mane.
Ma’lumot uchun, Afrika Millatlar Kubogining navbatdagi turniri 2027-yilning avgust oyida Keniya, Tanzaniya va Uganda davlatlarida bo‘lib o‘tadi.
Sadio Mane Angliyaning “Liverpul” klubi safidagi o‘yinlari orqali keng tanilgan. U ushbu jamoa bilan Angliya chempioni bo‘lgan va UEFA Chempionlar Ligasida g‘alaba qozongan.
33 yoshli Mane faoliyati davomida 614 ta uchrashuvda maydonga tushib, 249 ta gol va 126 ta golli uzatmaga mualliflik qilgan. Senegal terma jamoasi safida esa 124 ta o‘yinda 52 ta gol va 28 ta golli uzatmani amalga oshirgan. U terma jamoa tarixidagi eng yaxshi to‘purar hisoblanadi. Transfermarkt portali Manening bozor qiymatini 7 million yevroga baholagan.
