Qozog‘istonning ko‘plab hududlarida noyabr oyida anomal iliq ob-havo kuzatildi. Qator shahar va tumanlarda havo haroratining yangi maksimal ko‘rsatkichlari qayd etilib, o‘n yillardan buyon saqlanib kelgan rekordlarni yangiladi. Bu haqda Tengrinews xabar berdi.
- Noyabr oyidagi harorat rekordlari
Eng sezilarli isish oyning ikkinchi yarmida kuzatildi. Oqto‘bedagi ob-havo stansiyasida 14-noyabr kuni harorat +13,2 darajaga yetib, 2023-yilda qayd etilgan rekorddan (+10,6 daraja) oshdi. Ertasi kuni bu hududda yana bir yuqori ko‘rsatkich — +11,4 daraja qayd etilib, 2001-yilgi natijani ortda qoldirdi.
Anomal iliqlik shimoliy hududlarda ham kuzatildi. Ko‘kshatauda 19-noyabr kuni havo +8,3 darajagacha isib, 1977-yilgi rekordni yangiladi. 23-noyabrda esa +5,2 daraja qayd etilib, 1995-yildagi ko‘rsatkichdan yuqori bo‘ldi.
Jezqazg‘anda ketma-ket uch kun davomida harorat rekordlari yangilandi: 24–26-noyabr kunlari kunduzgi harorat mos ravishda +13,3, +10,3 va +12,3 darajani tashkil etdi. Qorag‘andida esa 26-noyabr kuni +9,4 daraja qayd etilib, 1971-yilgi rekorddan ancha yuqori natija ko‘rsatildi.
- Ostonadagi ob-havo
Poytaxtda noyabr oyidagi o‘rtacha havo harorati +0,3 darajani tashkil etib, iqlimiy me’yordan 5,5 darajaga yuqori bo‘ldi. Oyning eng sovuq kuni (−12,3 daraja) 4-noyabrda, eng yuqori harorat (+7,8 daraja) esa 26-noyabrda qayd etildi.
- Yog‘ingarchilik, tuman va kuchli shamol
Havo massalarining tez-tez o‘zgarib turishi fonida noyabr oyi davomida kuchli yog‘ingarchilik va noqulay ob-havo hodisalari kuzatildi. Ayrim joylarda yomg‘ir, qor yog‘di, tuman tushdi, yaxmalak bo‘ldi va shamol kuchaydi.
4-noyabr kuni Turkiston viloyatidagi Shuyldak meteorologiya stansiyasida 28 millimetr qor yog‘ib, oylik me’yorning uchdan bir qismidan ko‘prog‘ini tashkil etdi. Jetisu viloyatida bir necha kun davomida shamol tezligi soniyasiga 36 metrgacha yetgan bo‘ronlar kuzatildi. G‘arbiy Qozog‘iston viloyatida esa 15-noyabr kuni ko‘rish masofasi 50 metr bo‘lgan quyuq tuman qayd etildi. Qo‘stanay viloyatida ham kuchli qor yog‘ib, ayrim joylarda bir sutka ichida oylik yog‘ingarchilik me’yorining deyarli yarmi yog‘di.
