O‘zbekiston Superligasining 28-turidan o‘rin olgan bir qancha uchrashuvlarda ayol hakamlar ishtirok etdi. Jumladan, tajribali hakam Kristina Sereda “OKMK” – “Navbahor” uchrashuvida, yosh hakam Nasibabonu Toshmuhammedova esa “Nasaf” – “Mash’al” o‘yinida AVAR hakami sifatida vazifasini bajardi.
Bugun, 10-noyabr kuni bo‘lib o‘tadigan “Surxon” hamda “Sho‘rtan” o‘rtasidagi bellashuvda esa to‘rt nafar ayol hakam faoliyat olib borishi ko‘zda tutilgan. O‘zbekiston futbol hakamlar markazi bergan ma’lumotga ko‘ra, bu holat 2025-yilgi mavsumda ilk marta yuz bergan.
Mazkur uchrashuvda Kristina Sereda va Zilola Rahmatova yordamchi hakam, Gulshoda Saitqulova zaxira hakami, Dildora Rustamova esa AVAR hakami sifatida faoliyat olib boradi.
“Surxon” — “Shoʻrtan” bahsi rasmiylari:
Bosh hakam: Doston Rahmonov
Yordamchi hakamlar: Kristina Sereda, Zilola Rahmatova
Zaxira hakami: Gulshoda Saitqulova
Nazoratchi: Rustam Bobomurodov
VAR hakami: Toʻrabek Suyunov
AVAR hakami: Dildora Rustamova
Komissar: Oybek Davletmurodov
“Bu — ayol hakamlarimizning Superligadagi faol ishtiroki va ularning professional o‘sish yo‘lidagi navbatdagi muhim qadami sanaladi”, deyiladi O‘zFHM bayonotida.
