Rossiya 1990-yillardan beri ilk marta Ozarbayjon orqali temiryo‘l bilan Armanistonga bug‘doy yetkazib berdi. Bu haqda TASS nashri xabar berdi.
Rossiya bosh vaziri o‘rinbosari Aleksey Overchukga ko‘ra, Rossiya–Armaniston temiryo‘l aloqasining Ozarbayjon va Gruziya hududi orqali tiklanishi Janubiy Kavkazda tinchlik va barqarorlik yo‘lida muhim qadam hisoblanadi.
“Bu yo‘nalish mamlakatlarimiz o‘rtasida mustaqillikdan keyingi davrda ilk to‘g‘ridan to‘g‘ri temiryo‘l aloqasini ta’minladi. Bu voqea Janubiy Kavkazda tinchlik o‘rnatish va iqtisodiy rivojlanishga xizmat qiluvchi amaliy natijadir”, degan Overchuk.
Overchuk Ozarbayjon, Armaniston va Gruziya hukumatlariga transport yo‘llarini qayta ochishdagi hamkorligi uchun minnatdorlik bildirgan. Rossiya hukumatining ma’lum qilishicha, yangi yo‘nalish orqali ilk partiya – 15 ta vagon, ya’ni qariyb ming tonna bug‘doy Armanistonga yetkazilgan.
Rasmiy bayonotda aytilishicha, bu yo‘l tufayli Rossiya qishloq xo‘jaligi mahsulotlarini Armanistonga to‘g‘ridan to‘g‘ri va arzonroq transport xarajatlari bilan yetkazish imkoniyati paydo bo‘lgan.
Rejaga ko‘ra, 2026-yil yanvar oyigacha yana 132 ta vagon bug‘doy shu yo‘nalish orqali tashiladi. Kelajakda boshqa turdagi yuklarni ham tashish rejalashtirilgan. Armaniston yiliga 450–500 ming tonna don import qiladi, bu hajmning deyarli barchasi Rossiyadan keltiriladi.
