Sudanning qurolli Tezkor yordam kuchlari (RSF) Darfur mintaqasida joylashgan Al-Fashr shahridagi armiya shtab-kvartirasini egallaganini e’lon qildi. Bu haqda CNN xabar berdi.
Al-Fashr Sudan armiyasining Darfurdagi so‘nggi tayanch punkti edi. Bu g‘alaba RSF uchun muhim bo‘lib, shahar nazorati ularning muqobil hukumatini Darfur markazida mustahkamlashga imkon beradi. Quroli guruh 25-oktyabr kuni Bara shahrini ham egallab olgan edi. Shahar Darfur bilan mamlakat poytaxti Xartumni ajratib turuvchi muhim hudud hisoblanadi.
18 oylik qamal va inqiroz
RSF Al-Fashr shahrini 18 oy davomida qamalda ushlab turibdi. Bu davrda tinch aholi ko‘plab dron va artilleriya zarbalariga uchragan, 250 mingdan ortiq kishi ocharchilik yoqasida qolmoqda. Mutaxasislarning ogohlantirishicha, RSF shaharni to‘liq egallagan taqdirda etnik qasos hujumlari boshlanishi mumkin.
Sudanda armiya va RSF o‘rtasidagi urush dastlab 2023-yil aprel oyida boshlangan. Ilgari birgalikda hokimiyatda bo‘lgan ikki kuch o‘z qo‘shinlarini birlashtirish masalasida kelisha olmagach, ular orasida to‘qnashuv yuzaga kelgan. Urush oqibatida millionlab odamlar o‘z uyini tark etishga majbur bo‘lgan, mamlakatning yarmi ocharchilik yoqasiga kelib, yuqumli kasalliklar tarqalishi avj olmoqda.
Tinchlik muzokaralari
Hafta oxirida AQSH, BAA, Misr va Saudiya Arabistoni rasmiylari yig‘ilib, mojaroga tinch yechim topish masalasini muhokama qilgan. Sudan tashqi ishlar vazirligi vakillari Vashingtonda ikki tomonlama uchrashuvlarda qatnashayotganini bildirgan. Biroq armiya boshchiligidagi suveren kengash har ikki tomon vakillari ishtirokida bilvosita muzokaralar o‘tkazilayotgani haqidagi xabarlarni rad etmoqda.
