Afg‘onistonning Kobul shahrida fuqarolik jamiyati faollari va “Tolibon” rasmiylari ishtirokida milliy O‘zbek tili kuni nishonlandi. Bu haqda “Daryo”ning Afg‘onistondagi muxbiri xabar berdi.
Tadbirda afg‘on pedagoglari, shoirlari, yozuvchilari va jurnalistlari ishtirok etdi. Marosimga O‘zbekistonning Afg‘onistondagi elchixonasi vakillari va bir qator “Tolibon” hukumati rasmiylari ham tashrif buyurdi.
Dastur ishtirokchilari Afg‘onistonning madaniy birligini mustahkamlashda o‘zbek tilining rolini ta’kidladi. Ular “Tolibon” hukumatini ta’lim va ommaviy axborot vositalari tizimida turli tillarni, xususan, o‘zbek tilini qo‘llab-quvvatlash siyosatini ko‘rib chiqishga chaqirdi.
Marosim arafasida o‘zbek san’ati va madaniyatiga oid asarlar — kitoblar, xattotlik namunalari, rasmlar, milliy liboslar, qo‘lda to‘qilgan gilamlar hamda milliy taomlar ko‘rgazmasi tashkil etildi. O‘zbek tili kuni Afg‘onistonning Faryob, Sari Pul, Juzjon, Taxor va Badaxshon viloyatlarida ham nishonlanadi.
2020-yilda Afg‘oniston hukumati 21-oktyabrni “O‘zbek tili milliy kuni” sifatida nishonlashni belgilagan. Shu kunni mamlakat rasmiy taqvimiga kiritish to‘g‘risidagi qaror qabul qilingan.
O‘zbek tilining milliy bayrami avvalgi hukumat ag‘darilganidan va “Tolibon” hukmronligidan beri birinchi marta nishonlanmoqda. Oʻzbek tili Afgʻonistonning muhim tillaridan biri boʻlib, asosan shimoliy va shimoli-sharqiy viloyatlarda qoʻllanadi. Bu tilda so‘zlashuvchilar Afg‘onistonning 10 dan ortiq viloyatida istiqomat qiladi.
