O‘zbekiston milliy terma jamoasi futbolchisi Abbosbek Fayzullayev Kuvaytga qarshi o‘yinning 20-daqiqasida jarohat olib, maydonni tark etgandi. Chuqurlashtirilgan tibbiy ko‘rikdan so‘ng, shifokorlar tavsiyasi asosida Fayzullayevning Urugvayga qarshi bahsda ishtirok eta olmasligi ma’lum bo‘ldi. Bu haqda O‘zbekiston futbol assotsiatsiyasi matbuot xizmati xabar berdi.
O‘zbekistonning Urugvayga qarshi bellashuvi 13-oktyabr kuni Malayziyaning Raya Rumput shahridagi “Hang Jebat” stadionida bo‘lib o‘tadi. Bellashuv Toshkent vaqti bilan 17:45 da boshlanadi.
Ma’lumot uchun, O‘zbekiston terma jamoasi 9-oktyabr, payshanba kuni Toshkentdagi “Olimpiya” stadionida Kuvayt terma jamoasini qabul qilib, 2:0 hisobida g‘alaba qozondi. uchrashuvdagi gollarga Eldor Shomurodov hamda Hojimat Erkinov mualliflik qildi.
