Ukraina prezidenti Vladimir Zelenskiy 4-oktyabr kuni Rossiyaga qarshi yangi sanksiyalar paketini imzoladi. Bu haqda u o‘zining Telegram kanalida ma’lum qildi.
Zelenskiyga ko‘ra, bu sanksiyalar turli yo‘nalishlarni qamrab oladi:
Birinchi sanksiya paketi — muddati tugayotgan avvalgi sanksiyalarni uzaytirish bilan bog‘liq. Bu, asosan, Rossiya tadbirkorlari va ularning Putinga yaqin tizimlar bilan aloqadorligiga qarshi qaratilgan.
Ikkinchi paket — Rossiyaning harbiy sanoatiga, xususan, dronlar va ularning ehtiyot qismlarini ishlab chiqaruvchilarga qarshi sanksiyalar.
Uchinchi sanksiya to‘plami — Rossiyaning neft sanoati bilan bog‘liq shaxslar va kompaniyalarni nishonga oladi.
Ukraina rahbari mamlakat sanksiyalar bosimini davom ettirishini va bu borada xalqaro hamkorlar bilan hamohang ishlashini bildirgan.
“Bugun Ukrainada ishlab chiqilgan ko‘plab sanksiya mexanizmlari xalqaro hamkorlarimiz tomonidan ham qabul qilinmoqda. Yevroittifoqning 19-sanksiya paketi va AQSHning yangi choralarini kutyapmiz”, degan Zelenskiy.
Unga ko‘ra, Rossiya urushni to‘xtatish imkoniyatlarini inkor etmoqda va terroristik hamda razil uslublar bilan jang qilishni davom ettirmoqda.
“Yevropa, AQSH, G7 va G20 terrorizmga qarshi kurashishga qodir va bu ish amalga oshadi”, deya post yakunlangan.
