Angliyaning “Liverpul” klubi sobiq bosh murabbiyi Yurgen Klopp Saudiya Arabistonining “Al-Ittihod” jamoasiga bosh murabbiy sifatida taklif etilishi mumkin. Bu haqda Arriyadiyah nashri xabar berdi.
Manbaga ko‘ra, Jidda klubi bir nechta murabbiylar nomzodini ko‘rib chiqmoqda. Ular orasida Xavi Ernandes, Unai Emeri, Luchano Spalletti va Serxio Konseysau kabi mutaxassislar ham bor. Biroq klub rahbariyati aynan nemis murabbiyi Yurgen Kloppni taklif qilishni istamoqda.
Ma’lumot uchun, Klopp 2025-yil boshidan beri Red Bull kompaniyasining futbol tizimida faoliyat yuritib keladi. Germaniyalik mutaxassis 2024-yil yozida “Liverpul”ni tark etgan edi. U “Enfild”da salkam 9 yil ishlagan va jamoa bilan birgalikda UEFA Chempionlar Ligasi, Angliya Premer-ligasi hamda boshqa ko‘plab sovrinlarni qo‘lga kiritgan.
Eslatib o‘tamiz, “Al-Ittihod”ning sobiq bosh murabbiyi Loran Blan Saudiya Pro-ligasi 4-turida “An-Nassr”ga 0:2 hisobida mag‘lubiyatdan so‘ng lavozimidan ozod etilgan edi. Hozirda klub 9 ochko bilan turnir jadvalida 3-o‘rinda bormoqda.
