Rossiya armiyasi bilan shartnoma imzolab, Ukrainaga qarshi jang qilayotganlar soni keskin kamaydi. Ukraina Dezinformatsiyaga qarshi kurash markazi rahbari Andrey Kovalenkoning aytishicha, bu frontdagi talafotlar oshib borayotgani fonida yuz bermoqda.
Uning so‘zlariga ko‘ra, 2025-yilning ikkinchi choragida Rossiya Mudofaa vazirligi bilan 37,9 ming kishi shartnoma imzolagan. Bu so‘nggi ikki yildagi eng past ko‘rsatkich bo‘lib, 2024-yilning mos davriga nisbatan 92,8 ming kishiga yoki 2,5 baravarga kam.
Kovalenkoning ta’kidlashicha, Rossiya armiyasining Ukrainadagi yo‘qotishlarini shartnoma asosidagi xizmatchilar bilan qoplash imkonsiz.
Ukraina Bosh shtabi ma’lumotiga ko‘ra, 20-sentyabr holatiga ko‘ra Rossiya armiyasining yo‘qotishlari 1,1 milliondan oshgan. So‘nggi 24 soatda 1 070 nafar rus askari halok bo‘lgan.“Shartnoma asosidagi askarlar endi Rossiya armiyasining har haftalik yo‘qotishlarini to‘liq qoplay olmayapti. Ukraina Bosh shtabi ma’lumotiga ko‘ra, Rossiyaning kunlik talafotlari o‘rtacha ming nafardan ortadi”, dedi u.
Biroq “Mediazona” hamda BBC rus xizmati kabi mustaqil manbalarning ma’lumotlari bundan ancha kamtarroq. Ular tomonidan yo‘lga qo‘yilgan qo‘shma loyihaga ko‘ra, Rossiya qurolli kuchlari 130 150 nafar askaridan ayrilgan.
