O‘zbekiston milliy terma jamoasi bosh murabbiyi Temur Kapadze Xitoy futbol assotsiatsiyasi bilan muzokaralar olib bormoqda. Bu haqda Xitoyning “Sohu” nashri xabar berdi.
Manbaga ko‘ra, Kapadze Xitoy terma jamoasini boshqarishi mumkin bo‘lgan asosiy nomzodlardan biri sifatida ko‘rilmoqda. Xitoy futbol assotsiatsiyasi Temur bilan bir qatorda italiyalik mutaxassis Fabio Kannavaro hamda mahalliy murabbiy Chjen Chji nomzodlarini ham ko‘rib chiqayotgani aytilmoqda.
Agar muzokaralar ijobiy yakunlansa, Kapadze oktyabr oyida Xitoy terma jamoasini qabul qilib olishi kutilmoqda. Xabarlarga ko‘ra, Kapadze dastlab murabbiylik faoliyatini Qozog‘istonda davom ettirishni rejalashtirgan, biroq u yerdan taklif bo‘lmagach, Xitoy bilan muzokaralarni boshlagan.
44 yoshli Kapadze O‘zbekiston milliy terma jamoasining amaldagi bosh murabbiyi hisoblanadi. U 2025-yilning yanvar oyida “oq bo‘rilar” boshqaruviga kelgan bo‘lib, shu kungacha 9 uchrashuv o‘tkazgan. Bu bellashuvlarning 5 tasida g‘alaba qozonilgan bo‘lsa, qolgan 4 tasida durang qayd etilgan.
Shuningdek, Kapadze 2022 va 2024-yillarda O‘zbekiston U-23 terma jamoasini Osiyo Kubogi finaliga olib chiqqan. Qolaversa, O‘zbekiston olimpiya terma jamoasi bilan tarixida ilk bor yozgi Olimpiyada yo‘llanmasini qo‘lga kiritgan.
