Ukraina 2026-yilda harbiy xarajatlar uchun kamida 120 milliard dollar sarflashiga to‘g‘ri keladi. Bu haqda Yalta Yevropa strategiyasi konferensiyasida so‘zga chiqqan mamlakat mudofaa vaziri Denis Shmigal ma’lum qildi. Mulozim, shuningdek, mazkur summa urush to‘xtagan taqdirda ham deyarli o‘zgarmasligini ta’kidladi.
“Urush tugasa ham, zaxiralarni to‘ldirish uchun shuncha mablag‘ kerak bo‘ladi. Bu armiyani Rossiyaning navbatdagi ehtimoliy tajovuziga tayyor holatda ushlab turish uchun zarur”, dedi u. Vazirning so‘zlariga ko‘ra, hozirgi sharoitda kim mudofaa uchun kamroq mablag‘ sarflasa, o‘sha hududlari va fuqarolarining hayoti bilan tovon to‘laydi.
Shmigal, shuningek, Ukraina o‘zini yetarli miqdorda harbiy texnika bilan ta’minlay olishini aytib, hamkorlardan dronlar va ularni ishlab chiqarish uchun mablag‘ so‘radi.
“Urushni tugatish uchun kuchli Ukraina armiyasi, yetarli texnika va qurol-yarog‘, shuningdek, qat’iy ikkilamchi sanksiyalar zarur. Biz hamkorlardan shuni so‘raymiz”, dedi u.
Vazirning fikricha, Ukraina va hamkorlar Putinning o‘zi urushni tugatishni istab qoladigan sharoit yaratishi zarur. Shmigal bunga uzoq masofali dronlar bilan Rossiya hududiga zarbalarni intensivlashtirish orqali erishish mumkin deb hisoblashini aytdi.
Ukraina mudofaa vaziri, shuningdek Rossiya tinchlik o‘rnatilganidan so‘ng qayta hujum qilmasligi uchun barqaror mudofaa tizimini yaratish zarurligini urg‘uladi.
