Taxminlarga ko‘ra, bu obyektlar Rossiya kuchlarining Ukraina g‘arbiy hududlariga uyushtirgan hujumlari bilan aloqador bo‘lishi mumkin. Hodisa sabab Chopin, Modlin, Jashonka (Rjeshuv) va Lyublin aeroportlarida barcha parvozlar bekor qilingan. Rasmiy bayonotda aytilishicha, ayrim dronlar urib tushirilgan. Qurolli kuchlar eng yuqori jangovar tayyorgarlik holatiga keltirilgan.
“Qurolli kuchlar harakatga keltirildi. Havo hududini buzgan obyektlar yo‘q qilinmoqda, ularning joylashuvi aniqlanmoqda”, deyiladi Polsha armiyasining X’dagi rasmiy bayonotida.
Polsha bosh vaziri Donald Task harakatlarga mos ravishda javob qaytarilayotganini bildirgan. Mamlakat mudofaa vaziri o‘rinbosari Tsezari Tomchikning aytishicha, Task shaxsan voqea joyida bo‘lib turibdi.
Chegara hududlar xavf ostida
Polsha armiyasi tomonidan Podlaskiye, Mazoviyeskiye va Lyublin voyevodeliklari — yaʼni Belarus va Ukraina bilan chegaradosh sharqiy mintaqalar — ayni paytda eng katta xavf ostida ekani bildirilmoqda.
“Bu — Polsha havo hududining misli ko‘rilmagan darajadagi buzilishi”, deyiladi qurolli kuchlar bayonotida.
