Angliyaning Liverpul shahrida boks bo‘yicha kattalar o‘rtasidagi jahon chempionati davom etmoqda. 7-sentabr, yakshanba kuni O‘zbekiston terma jamoasining 5 nafar bokschisi ringga chiqib, ularning barchasi g‘alaba qozondi.
Dastlab,-55 kg vazn toifasida Mirazizbek Mirzahalilov
ringga chiqdi. U hindistonlik Pavan Bartvalga qarshi jang olib borib, raqibiga hech qanday imkoniyat qoldirmadi — 5:0. Mirzahalilov navbatdagi jangini 9-sentabr kuni o‘tkazadi.-80 kg vazn toifasida jang qiladigan Javohir Ummataliyev polshalik Nikodem Kozakni qiynchiliksiz mag‘lub etdi. Bahs davomida u raqibini nokdaunga ham tushirib qo‘ydi. Hisob — 5:0. Javohir endi 9-sentabr kuni chorak finalga chiqish uchun ringga ko‘tariladi.
Kunning kechki dasturlarida yana 3 nafar o‘zbekistonlik bokschi ringga chiqdi. -57 kg vazn toifasida Xumorabonu Mamajonova Chernogoriya vakilasi Boyana Goykovichni qiynchiliksiz 5:0 hisobida mag‘lub etib, chorak finalga yo‘l oldi. Mamajonova 10-sentabr kuni yarim final yo‘llanmasi uchun ringga chiqishi kutilmoqda.
-70 kg vazn toifasida jang qiladigan Aziza Zokirova ham navbatdagi bosqichga yo‘l oldi. U Vengriya vakilasi Regina Lakosni uchinchi raundda texnik nokautga uchratdi. Zokirova 9-sentabr kuni yarim finalga chiqish uchun ringga chiqdi.
Kunning oxirgi jangida ham O‘zbekiston terma jamoasi a’zosi g‘alaba qozondi. -65 kg vazn toifasida jang qiladigan Asadxo‘ja Mo‘ydinxo‘jayev Xitoy vakili Jianxao Judan 5:0 hisobida ustun keldi.
Shu tariqa, O‘zbekiston terma jamoasi a’zolari musobaqaning 4-kunini ham mag‘lubiyatsiz yakunladi. 8-sentyabr, dushanba kuni yana 7 nafar o‘zbekistonlik bokschilar ringga ko‘tarilishi kutilmoqda.
Juftliklar bilan tanishing:
-54 kg: Nigina O‘ktamova — Anna Lakotar (Vengriya) 16:30
-70 kg: Shavkatjon Boltayev — Bernad Martinez (Ispaniya) 17:45
-90 kg: To‘rabek Habibullaev — Vagkan Nanitsanian (Gretsiya) 18:45
-65 kg: Navbahor Hamidova — Oshin Deriyev (Belarus) 22:00
-60 kg: Abdumalik Halokov — Juzippe Kanoniko (Italiya) 23:00
-75 kg: Fazliddin Erkinboyev — Sultan Osmanli (Turkiya) 00:00
+90 kg: Jahongir Zokirov — Nikita Putilov (Germaniya) 01:45
Musobaqaning birinchi dasturi O‘zbekiston vaqti bilan soat 16:00, kechki dastur esa 22:00 da boshlanadi.
