UFC’ning o‘rta vazn toifasida (-84 kg) jang qiladigan, hali biror marta mag‘lubiyat nimaligini bilmay kelayotgan rossiyalik sportchi Hamzat Chimayev o‘zini ikki vazn toifasidagi sobiq chempion Konor Makgregor bilan taqqoslashlariga munosabat bildirdi.
Men va u butunlay boshqa jangchilarmiz. Konor ko‘proq raqibga zarba berish orqali g‘alaba qozonadi. Uning boksi yaxshi, ayniqsa, qarshi hujumda kuchli. Ammo boshqa tomonlama u kuchsizroq. Balki men ham shunga o‘xshash tarzda chempionlik kamarini qo‘lga kiritarman. Sababi men ham “stoyka”da yomon jang qilmayman. Har narsa bo‘lishi mumkin. Kamar uchun bo‘ladigan jang qanday kechishini oldindan ayta olmayman, — dedi Chimayev ESPN telekanaliga bergan intervyusida.
Eslatib o‘tamiz, Hamzat Chimayev navbatdagi jangini o‘rta vazn toifasidagi amaldagi chempion, janubiy afrikalik Drikus dyu Plessiga qarshi o‘tkazadi. Mazkur jang 17-avgust kuni AQShning Chikago shahrida bo‘lib o‘tadigan UFC 319 turnirining asosiy bahsi bo‘lishi kutilmoqda.
Ma’lumot uchun, Chimayev oxirgi jangini 2024-yil 26-oktabr kuni Abu-Dabida o‘tgan UFC 308 turnirida Robert Uittakerga qarshi o‘tkazib, g‘alaba qozongan edi.
