Saudiya Arabistonining “An-Nassr” klubi bosh murabbiyi etib tayinlangan Xorxe Jezush jamoaning asosiy yulduzi — 40 yoshli Krishtianu Ronalduga oid fikrlarini bildirdi.
Portugaliyalik mutaxassis 70 yoshda bo‘lishiga qaramay, o‘zining jismoniy holati Ronaldunikiga yaqinligini ta’kidlab o‘tdi:
Ronaldu — noyob futbolchi. U 40 yoshda ham yuqori darajada o‘ynashda davom etmoqda. Men ham 70 yoshda bo‘lishimga qaramay, na jismonan, na ruhan bu yoshni his qilmayman. Futboldan tashqari hayotga bo‘lgan qarashlarimiz ham juda o‘xshash. Ronaldu — dunyo miqyosidagi shaxs. Ba’zan Portugaliyada ham biz uni to‘g‘ri baholay olmaymiz. U futbol doirasidan tashqariga chiqqan shaxs, — dedi Jezush RTP telekanali bergan intervyusida.
Eslatib o‘tamiz, Saudiya Pro Ligasining yangi mavsumi 21-avgust kuni boshlanadi. Krishtianu Ronaldu “An-Nassr” safida 2023-yil yanvaridan beri to‘p surmoqda. Shu vaqt davomida u Riyod klubi tarkibida 105 ta o‘yinda maydonga tushib, o‘z hisobiga 93 ta gol va 19 ta golli uzatma yozdirib qo‘ygan.
