Qo‘shma Shtatlarning Isroildagi elchisi Mayk Xakabi G‘arbiy Sohildagi cherkovga qilingan hujumni “terakt” deb atadi va aybdorlarni javobgarlikka tortishga chaqirdi.
Elchi Xakabining aytishicha, u Taybe shahriga borib, isroillik ko‘chmanchilar tomonidan 8-iyul kuni o‘t qo‘yilgan qabriston va V asrga oid cherkovni ko‘zdan kechirgan.
“Bu terrorchilik harakati va jinoyatdir. Taybeda yoki boshqa joyda bunday hujumlarni amalga oshirganlar topilib, javobgarlikka tortilishi shart. Shunchaki ogohlantirish yetarli emas”, dedi Xakabi o‘z bayonotida.
Xakabi bundan bir necha kun oldin ham G‘arbiy Sohildagi yahudiy ko‘chmanchilar tomonidan kaltaklab o‘ldirgan falastinlik-amerikalik yigitning o‘limi yuzasidan “agressiv tergov” talab qilgan va hodisani “jinoyat va terrorchilik harakati” deb baholagan edi.
Tramp ma’muriyatining pozitsiyasi
Mayk Xakabi Isroil hukumati tomonidan yashirincha dastaklanadigan yahudiy ko‘chmanchilari posyolkalarining ashaddiy tarafdori hisoblanadi. Shunga qaramay, uning bu fikrlari Donald Tramp ma’muriyatining Isroilga qarshi kamdan-kam uchraydigan keskin bayonotlaridan biridir.
Donald Tramp hokimiyatga kelgan yanvar oyidayoq isroillik ko‘chmanchilar va guruhlarga nisbatan sobiq prezident Bayden davrida qo‘yilgan sanksiyalarni bekor qilgan edi.
Zo‘ravonlik kuchaymoqda
G‘arbiy Sohilda isroillik ko‘chmanchilarning falastinliklarga hujumlari 2023-yilning 7-oktyabr sanasidan buyon yanada kuchaydi. Biroq bosib olingan hududlar bo‘ylab zo‘ravonlik holatlari undan oldin ham keng tarqalgan edi.
BMT sudining eng yuqori instansiyasi o‘tgan yili Isroil tomonidan 1967-yilgi urushda egallangan hududlar, jumladan G‘arbiy Sohilda qurilgan posyolkalarni noqonuniy deb topdi. Tel-Aviv esa, tabiiyki, o‘ziga qo‘yilgan ayblovlarni rad qiladi.
