Indoneziyada politsiya chaqaloqlarni Singapurga sotgan 12 nafar odam savdogarlarini hibsga oldi. Bu haqda Al Jazeera xabar berdi.
Politsiyaning ma’lum qilishicha, bu holat ota-ona go‘dak o‘g‘irlab ketilgani haqida xabar berganidan so‘ng aniqlangan. Gumondorlar 24 nafar chaqaloqni sotganini tan olgan. Go‘daklarning aksariyati G‘arbiy Yava provinsiyasida o‘g‘irlangan.
“Ma’lumotlarga ko‘ra, 14 nafar chaqaloq Singapurga sotilgan. Ularning yosh diapazoni asosan bir yoshgacha, ba’zilari 3, 5 va 6 oylik”, deyiladi politsiya bayonotida.
Rasmiylar Pontianak shahrida 5 nafar va Tangerang shahrida bir nafar chaqaloqni qutqarishga muvaffaq bo‘lgan. Qo‘shimcha qilinishicha, chaqaloqlar 11 milliondan (676 dollar) 16 million Indoneziya rupiyasigacha (983 dollar) sotilishi kerak edi. Shuningdek, Jakarta, Pontianak va Bandung shahrida o‘nlab gumonlanuvchilar hibsga olingan. Odam savdosi bilan shug‘ullanuvchilar 2023-yilda chaqaloq sindikatiga asos solgani ma’lum bo‘ldi.
Ta’kidlanishicha, har bir gumonlanuvchining o‘z vazifasi bo‘lgan. Ba’zilar chaqaloq topish bilan shug‘ullansa, ba’zilari ularga g‘amxo‘rlik qilgan. Hujjatlarni rasmiylashtirish uchun ham alohida shaxslar tayinlangan.
Indoneziyada odam savdosi kam uchraydigan holat emas. 2022-yili Shimoliy Sumatradagi palma yog‘i plantatsiyasida o‘g‘irlab ketilgan 57 nafar kishi qafasda topilgan edi.
