Advent Health klinikasining Global robototexnika instituti direktori, shifokor Vipul Patel dunyoda ilk bor minglab kilometr uzoqlikda joylashgan bemorga masofadan turib, robot yordamida jarrohlik amaliyoti o‘tkazdi. Bu haqda The Independent nashri xabar berdi.
67 yoshli Fernandu da Silva angolalik bo‘lib, unga prostata bezi saratoni tashxisi qo‘yilgan edi. U transkontinental robotlashtirilgan telejarrohlik texnologiyasi klinik sinovlarida qatnashgan ilk bemor bo‘ldi.
“Biz buni ustida ikki yil davomida ishladik. Butun dunyoni kezib, texnologiyalarni o‘rgandik va eng mosini tanladik”, deydi shifokor.
Avval ham operatsiyalarda robotlar qo‘llanilgan, biroq ularni boshqargan shifokorlar bemordan unchalik uzoq bo‘lmagan joyda bo‘lgan.
Operatsiya muvaffaqiyatli o‘tgan. Jarayon davomida har ehtimolga qarshi bemor joylashgan operatsion xonada jarrohlik jamoasi ham navbatchilik qilgan. Patel esa bu jarayonni tibbiyot sohasida katta burilish deya ta’rifladi.
Doktor Patel bu texnologiyaning kelajakdagi imkoniyatlariga katta umid bog‘lamoqda.
“Hatto AQSHning chekka qishloqlarida ham bu texnologiya foydali bo‘lishi mumkin. Kelajakda tez yordam mashinalarida yoki favqulodda holatlarda bemorlarga masofadan turib tezkor yordam ko‘rsatish imkoniyati paydo bo‘ladi”, deydi u.
Bundan oldin Xitoyda robotlar ishtirokida ilk futbol turniri bo‘lib o‘tgan edi.
