Kecha, 4-iyul kuni Rossiya va Ukraina o‘rtasida yana bir harbiy asirlar almashinuvi bo‘lib o‘tdi. Bu haqda birinchi bo‘lib Rossiya Mudofaa vazirligi xabar berdi, keyinroq Ukraina prezidenti Vladimir Zelenskiy ham almashinuvni tasdiqladi.
“Vatanimiz himoyachilari o‘z uylariga qaytdi! Ularning aksariyati 2022-yildan beri Rossiya asirligida edi”, deb yozdi Zelenskiy o‘zining Telegram-kanalida.
Rossiya Mudofaa vazirligi 2-iyun kuni Istanbulda erishilgan Rossiya-Ukraina kelishuvlariga ko‘ra yana bir guruh rossiyalik harbiy xizmatchilar qaytarilgani evaziga Ukraina qurolli kuchlarining bir guruh harbiy asirlari o‘tkazilganini ma’lum qildi.
“Ayni vaqtda Rossiya harbiy xizmatchilari Belarus Respublikasi hududida bo‘lib, u yerda ularga zarur psixologik va tibbiy yordam ko‘rsatilmoqda”, deyiladi Rossiya tomonining xabarida.
Bu iyun oyi boshida Istanbulda ikki davlat delegatsiyalari o‘rtasidagi muzokaralar chog‘ida erishilgan kelishuvlar doirasidagi sakkizinchi harbiy asirlar almashinuvi bo‘ldi. Tomonlar qancha mahbusni bir-biriga topshirgani haqida ma’lumot bermagan.
