Quyosh tizimiga A11pl3Z (3I/ATLAS) nomli yulduzlararo obyekt kirib keldi. Bu haqda Yevropa kosmik agentligiga asoslanib EarthSky portali xabar bermoqda.
“Hozirda bizga boshqa quyosh tizimidan kometaga o‘xshash jism tashrif buyurmoqda”, deya ta’kidlanadi xabarda.
Portal ma’lumotlariga ko‘ra, obyektning Quyoshga eng yaqin kelishi oktyabr oyida, A11pl3Z Mars orbitasi ichiga kirganida sodir bo‘ladi. Nashr mualliflarining ta’kidlashicha, bu samoviy jism Yerga hech qanday xavf tug‘dirmaydi.
Obyektning kelib chiqishi uning harakat yo‘nalishidan ma’lum bo‘lmoqda. Mutaxassislar fikricha, obyekt yadrosi diametri 20 kilometrgacha bo‘lgan kometadan iborat. A11pl3Z Quyosh tizimidagi uchinchi yulduzlararo obyekt hisoblanadi.
Bundan oldin xalqaro astronomlar guruhi o‘lchamlari, harorati va zichligi jihatidan Yerga o‘xshash GJ 12 b ekzosayyorasini kashf etgan edi. Bu dunyo sayyoramizdan atigi 40 yorug‘lik yili uzoqlikda joylashgan bo‘lib, Quyosh tizimidan tashqaridagi hayotni izlash uchun muhim nuqta bo‘lishi mumkin.
