61 yoshli Jeff Bezos va 55 yoshli Loren Sanches Venetsiyada nishonlayotgan to‘y marosimi munosabati bilan mehmonlardan ularga sovg‘a bermaslikni so‘rashdi. Ular do‘stlarining bu tarixiy shaharga xayriya qilishini istaydi.
Bu haqda People nashriga Venetsiya munitsipalitetining savdo va ishlab chiqarish masalalari bo‘yicha mas’ul maslahatchisi Sebastyano Kostalonga ma’lum qildi.
“Bezos sovg‘alar kelin-kuyovga emas, balki Venetsiyaga berilishi kerakligini aytdi”, dedi u va “juda zaiflashib qolgan shaharni obodonlashtirish uchun mablag‘ olishdan juda xursand” ekanliklarini qo‘shimcha qildi.
Amazon asoschisi va uning bo‘lajak turmush o‘rtog‘ining bunday bayonot berishi Venetsiyaning tarixiy markazida to‘yga qarshi norozilik plakatlari paydo bo‘layotgan paytga to‘g‘ri keldi. Shaharning ko‘plab aholisi bu tadbirga salbiy munosabat bildirgan edi. Biroq Sebastyanoning aytishicha, venetsiyaliklarning aksariyati bunday tadbirlarga xotirjam munosabatda.
Eslatib o‘tamiz, dunyoning eng boy insonlaridan biri hisoblangan Jeff Bezosning to‘yi 27–29-iyun kunlari bo‘lib o‘tadi. Marosimda taxminan 250 nafar mehmon ishtirok etishi kutilmoqda.
Foto: Page Six
Jeff Bezos va Loren Sanches unashtirilganiga deyarli 2 yil bo‘ldi. 2023-yil may oyida 5 yillik munosabatlardan so‘ng Bezos Sanchesga turmush qurishni taklif qilgan.
